ބ. އަތޮޅުގެ ބައޮސްފިއާ ރިޒާވްގެ ގޮތުގައި ކަނޑައަޅާފައިވާ ސަރަހައްދުގައި ނުވަ ކޯ އޭރިއާ ހިމެނޭއިރު އެ ހުރިހާ އޭރިއާއެއް އަދިވެސް އެންމެ ފުރިހަމައަށް މެނޭޖް ނުކުރެވޭކަމަށް އެންވަޔަރްމެންޓް މިނިސްޓަރު ތޯރިގް އިބްރާހިމް ވިދާޅުވެއްޖެ އެވެ.
ބ. އަތޮޅުގެ ބަޔޮސްފިއާ ރިޒާވްގެ ގޮތުގައި ހިމެނޭ ސަރަހައްދުތަކުގެ ހިތްގައިމުކަމާ ދިރުންތައް ދައްކުވައިދޭ ފޮޓޯތައް ހިމެނޭ ސްޓޭމްޕް ސެޓާއި ޕޯސްޓްކާޑް ތައާރަފްކުރުމަށް އިއްޔެ ބޭއްވި ރަސްމިއްޔާތެއްގައި ވާހަކަދައްކަވަމުން މިނިސްޓަރު ވިދާޅުވި ގޮތުގައި ބ. އަތޮޅުގެ ބައޮސްފިއާ ރިޒާވް ހިމާޔަތްކޮށް މެނޭޖްކުރަން ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން، އެތަން މެނޭޖްކުރާ ކޮންޒަވޭޝަން ސެންޓަރެއް ގާއިމްކޮށް، އެތަންތަނަށް އާމްދަނީ ހޯދަން ކޮންޒަވޭޝަން ފަންޑެއް ހުޅުވައި އެ ފަންޑަށް ރިސޯޓްތަކާ ޑައިވިން ސްކޫލްތަކުގެ މެންބާޝިޕް ހޯދަން މަސައްކަތްތަކެއް ކޮށްފައިވާކަން މިނިސްޓަރު ފާހަގަކުރެއްވި އެވެ.
“އަޅުގަނޑުމެން މިހާރުވެސް އެތަނުން އެއް ސަރަހައްދު މި މެނޭޖްކުރަނީ ދުނިޔޭގެ ކުރިއަރާފައިވާ ތަންތަންވެސް ބަލަހައްޓާ ގޮތަށް. އެތަނަށް ލިބޭ އާމްދަނީ އާންމުންނަށް ލިބޭގޮތް ހަދަން ފަންޑެއް ހުޅުވައި، އެ ތަންތަން ބަލަންދާ ޓޫރިސްޓުންނާ، ޑައިވްކުރަންދާ ފަރާތްތަކުން ނަގާ ފީވެސް ޖަމާކުރަނީ އެ ފަންޑަށް. ހަމަ އެގޮތަށް އެހެން ޒޯންތައްވެސް އަޅުގަނޑުމެން އަދި މެނޭޖްކުރަން ފަށާނަން. ބައޮސްޕިއާ ރިޒާވް ރާއްޖޭގައި އިތުރުކުރުމަކީ މުހިއްމު ކަމެއް. މިއީ އަޅުގަނޑުމެންނަސް އިގްތިސޯދު ހީވެސް ނުކުރާހާ މަތިކޮށްލެވޭނެ ކަމެއް،” ތޯރިގް ވިދާޅުވި އެވެ.
މިނިސްޓަރު ވިދާޅުވީ އެ ތަންތަން މެނޭޖްކުރަންވެސް ޕްލޭންތަކެއް އެކުލަވާލައި އަންނަ އަހަރުން ފެށިގެން ވަކި ގަވާއިދެއްގެ ދަށަށް އެ ސަރަހައްދަށް ޒިޔާރަޔްކުރުމާ ޑައިވްކުރުން ހަމަޖައްސާނެ ކަމަށެވެ.
ބަޔޮސްފިއާ ރިޒާވުގެ ދަށުން ބ. އަތޮޅުގައި ކަނޑައަޅާފައިވާ ކޯ އޭރިޔާތަކުގެ ތެރެއިން އެންމެ ހާއްސަ ތަނަކީ ހަނިފަރެވެ. އެއީ އެ ސަރަހައްދުން އެންމަޑި އާއި ފެހުރިހި ފެންނާތީ އެވެ. އެ ސަރަހައްދަކީ ފީނުމަށް ރާއްޖެ އަންނަ ޓޫރިސްޓުންގެވެސް ވަރަށް މުހިންމު މަންޒިލެކެވެ. ތަފާސް ހިސާބުތަކުން ދައްކާ ގޮތުގައި ހަނިފަރަށް ފީނާ މީހުންގެ އަތުން އެތައްހާސް ޑޮލަރެއް (3.85 މިލިއަން ރުފިޔާ ނުވަތަ 250000 އެމެރިކާ ޑޮލަރު) ރާއްޖޭގެ އިގްތިސާދަށް އަހަރަކު ލިބެ އެވެ.
ބައޮސްފިއާ ރިޒާވްގެ ގޮތުގައި ބ އަތޮޅުގައި ފާހަގަކޮށްފައިވާ ސަރަހައްދުގައި ހިމެނޭ މައިގަނޑު ތަންތަން:
– ހަނިފަރު (ވަށައިގެންވާ ފަރާއެކު)
– ދިގަލިހާ އަދި ދިގަލިހާ ގިރި ފަރު
– އަނގަފަރު (ދޮންފަނު ތިލަ އަދި ދިގުތިލަ އާ އެކު)
– އޮޅުގިރި، ގޮއިދޫ ކޯރު ސަރަހައްދު
– ނިބިލިގާރަށް، މާހުރަވަޅި، ބަތަލާހުރާ
– މަތިފަރު ހުރާ
މި ސަރަހައްދުތަކަކީ ރާއްޖޭގައި އެންމެ ގިނަ އަދަދަކަށް ފެހުރިއްސާ އެނޫންވެސް އެހެން ސަރަހައްދުތަކުން މަދުން ފެންނަ ކަނޑުގެ ދިރުންތައް ގިނައިން ހުންނަ ސަރަހައްދުތަކެކެވެ
ކޮބާދެން އެލާރިތައް؟ އީޓީން ވެއްޖެ އެންނު އެލާރިތައް ޚަރަދުކުރާ ގޮތްބަލަން/