މާޅޮސް އަތުން 1-0 އިން މޮޅުވެ، ބ. އެޓޯލް ފުޓްބޯލް ޗެލެންޖުގެ ސެމީގެ ފުރަތަމަ ޖާގަ އެންމެފަހުގެ ޗެމްޕިއަން ގޮއިދޫ ޓީމުން ކަށަވަރު ކޮށްފި އެވެ.
ބާކީ އެއް މެޗު އޮއްވާ އެންމެފަހުގެ ޗެމްޕިއަން ގޮއިދޫ ސެމީ އަށް ދަތުރުކުރީ ކުޅުނު ދެ މެޗުން ވެސް މޮޅުވެ ހަ ޕޮއިންޓާ އެކު އެވެ.
މިއަދުގެ މެޗުން ބަލިވި މާޅޮސް ކުޅުނު ދެ މެޗުންވެސް ބަލިވެ އެއްވެސް ޕޮއިންޓެއް ނުލިބި ވަނީ މުބާރާތުން ކަޓައިފަ އެވެ. މެޗުގައި މާޅޮހު ޓީމުގެ ފަރާތުންވެސް ވަނީ ރަނގަޅު ކުޅުމެއް ފެނިގެން ގޮސްފަ އެވެ. އަދި އެ ޓިމަށް ލަނޑު ޖަހާނެ ފުރުސަތުތައް ލިބުނު ނަމަވެސް ބޭނުން ނުކުރެވުނެވެ.
އޭދަފުށީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުގައި ގޮއިދޫ ޓީމަށް ލަނޑު ގޯލް ކާމިޔާބުކޮށް ދިނީ ފުރަތަމަ ހާފު ނިމެނިކޮށް ލިބުނު ޕެނަލްޓީއަކުން އާދަމް ނިޒާމު އެވެ.
މިއަދު މެންދުރު ކިހާދޫ އާއި ފުޅަދޫ ބައްދަލުކުރި މެޗު ނިމުނީ 1-1 އިން އެއްވަރު ވެގެންނެވެ.
މި މުބާރާތުގައި މާދަމާ ކުޅޭ ފުރަތަމަ މެޗުގައި މެންދުރު 1:30 ގައި އޭދަފުއްޓާ ދެކޮޅަށް ނުކުންނާނީ ފުޅާދޫއެވެ. އަދި ދެވަނަ މެޗުގައި ހަވީރު ކުޑަރިލާ ދެކޮޅަށް ކުޅޭނީ ދަރަވަންދޫ އެވެ.
