ތިމާވެއްޓާ ރައްޓެހި ހަކަތަ އަށް ބަދަލުކުރުމަށް ސަރުކާރުން ކުރަމުން އަންނަ މަސައްކަތުގެ ދަށުން ޗައިނާ އިން ރާއްޖެ އަށް ހަދިޔާ ކުރި ލެޑް ލައިޓް އޭދަފުށިން ބޭނުންވާ ފަރާތްތަކަށް ނަންނޯޓް ކުރުމަށް ފެނަކަ އޭދަފުށީ ބްރާންޗުން މިއަދު ހުޅުވާލައިފި އެވެ.
އެ ބްރާންޗުން ކޮށްފައިވާ އިއުލާނެއްގައި ބުނެފައިވަނީ ނަން ނޯޓް ކުރުމުގެ ފުރުސަތު މިއަދުން ފެށިގެން މިމަހުގެ 20 ގެ ނިޔަލަށް ހުޅުވާލާފައިވާ ކަމަށެވެ. ވަކިން ކަރަންޓް މީޓަރު ލާފައިވާ ކޮންމެ ގޭ ބިސީ އަކަށް 5 ލެޑް ލައިޓް ފޯރުކޮށްދޭނެ ކަމަށްވެސް އެ އިއުލާނުގައި ބުނެފައިވެ އެވެ.
ލައިޓް ބޭނުންވެގެން ނަން ނޯޓް ކުރާއިރު ގޭ ބިސީއަށް ނިސްބަތްވާ މީހަކު އައިޑީކާޑުގެ ކޮޕީއަކާއެކު ފެނަކަ އޭދަފުށީ ބްރާންޗަށް ހާޒިރުވާންޖެހެ އެވެ. ނަން ނޯޓްކުރުމަށް ހަމަޖެހިފައިވަނީ ބަންދު ނޫން ކޮންމެ ދުވަހެއްގެ ހެނދުނު 8:30ން ފެށިގެން މެންދުރުފަހު 3:00 އާ ހަމައަށް ކަމަށް ވެސް އެ އިއުލާނުގައިވެ އެވެ.
ޗައިނާ ސަރުކާރުގެ ހިލޭ އެހީގެ ދަށުން މި ފަހަރު ލިބިފައި ވަނީ ދެ ލައްކަ ދިހަ ލައިޓު ކަމަށެވެ. މީގެ ތެރޭގައި ހިމެނެނީ 78،750 ހޮޅިބުރި އާއި 131،250 ލެޑް ބޮތްކެވެ. އެއީ 10 މިލިއަން ރުފިޔާގެ އަގުހުރި ލައިޓްތަކެކެވެ.
މިދިޔަ އަހަރު ޗައިނާ އިން ހަދިޔާ ކުރި ދެ ލައްކަ އަށް ވުރެ ގިނަ ލެޑް ލައިޓް ވަނީ އާންމު ފަރުދުންނަށާއި ދައުލަތުގެ މުއައްސަސާތަކަށާއި ސަރުކާރުގެ އޮފީސްތަކަށް ފޯރުކޮށްދީފަ އެވެ. އެގޮތުން 164 ރަށަކާއި 511 މުއައްސަސާ އަށް ވަނީ ހޮޅިބުރި ފޯރުކޮށްދީފަ އެވެ.
