ބ. އަތޮޅު ކައުންސިލުން މިދިޔަ އަހަރު ބޭއްވި ހަރަކާތްތައް އިންތިޒާމު ކޮށް ކުރިއަށް ގެންދިއުމުގައި އިސްކޮށް މަސައްކަތް ކުރެއްވި ފަރާތްތަކާއި އެކި ގޮތްގޮތުން ކައުންސިލަށް އެހީތެރިވެދެއްވި ފަރާތްތަކުގެ އަގު އަތޮޅު ކައުންސިލުން ވަޒަންކޮށްފި އެވެ.
އޭދަފުށީ ޔޫތު ސެންޓަރު ގޯތި ތެރޭގަިއ ރޭ ބޭއްވި ރަސްމިއްޔާތެއްގައި އެ ފަރާތްތަކަށް ސެޓްފިކެޓާއި ހަނދާނީ ފިލާ ދެއްވީ ބ. އަތޮޅު ކައުންސިލު މެންބަރުންނާއި އެ އިދާރާގެ އިސްވެރިންނެވެ.
ސެޓްފިކެޓް ދެއްވީ މިނިވަން 50 ފާހަގަ ކުރުމުގެ ގޮތުން މިދިޔަ އަހަރު ބޭއްވި ފުނަ ހަރަކާތަށް އެހީތެރވެދެއްވި އޮފީސް/ކުންފުނި އަދި ކްލަބް ޖަމިއްޔާ ތަކުގެ އިތުރުން އަތޮޅު ކައުންސިލު އިދާރާގެ މުވައްޒަފުންނަށެވެ.
މީގެ އިތުރުން ބ. އަތޮޅުގައި ބޭއްވި ފުނަ ހަރަކާތުގެ ތީމު ލަވަ ތައްޔާރުކޮށްދެއްވައި އެ ހަރަކާތް ކުރިއަށް ގެންދިއުމުގައި ފަންނީ ލަފަޔާ އިރުޝާދު ދެއްވާފައިވާތީ ކޮޕީ މުހައްމަދު ރަޝީދަށް ރޭ ވަނީ ހާއްސަ ހަނދާނީފިލައެއް ދެއްވާފަ އެވެ.
އަދި ބ. އަތޮޅު އޮފީހާއި އަތޮޅު ކައުންސިލުގެ އިތުރުން ސަރުކާރުގެ ގިނަ މަގާމުތަކެއް ފުރުއްވާ 38 އަހަރަށްވުރެ ގިނަ ދުވަހު ޚިދުމަތްކޮށްދެއްވާފާއިވާތީ އެކަމުގެ އަގުވަޒަން ކުރުމުގެ ގޮތުން އަބްދުލްބާޤިރު އަހުމަދަށްވެސް ހަނދާނީފިލައެއް ވަނީ އަރުވާފައެވެ. އަބްދުލްބާގިރު ވަނީ މިދިޔަ އަހަރު ފަހުކޮޅު އަމިއްލައަށް ރިޓަރާ ކުރައްވާފަ އެވެ.
މި ރަސްމިއްޔާތުގައި ވާހަކަ ދައްކަވަމުން އަތޮޅު ކައުންސިލުގެ ރައީސް މުހައްމަދު އާދިލު ވިދާޅުވީ މިދިޔަ އަހަރު އަތޮޅު ކައުންސިލުން ހިންގި މުހިއްމު ހަރަކާތްތައް ކާމިޔާބު ކަމާއެކު ކުރިއަށް ގެންދެވުނީ ހުރިހާ ފަރާތްތަކެއްގެ އެއްބާރުލުމާ އެހީތެރިކަމާއެކު ކަމަށެވެ. އަދި މިއަހަރުގެ ހަރަކާތްތައްވެސް ކުރިއަށް ގެނދިއުމުގެ ހުރިހާ ފަރާތަތަކެއް އެހީތެރިކަމާ އެއްބާރުލުން ބޭނުންވާނެ ކަމަށް އާދިލު ވިދާޅުވި އެވެ.
