ސްޕޯޓްސް އެރީނާ ޕްރޮޖެކްޓްގެ ދަށުން ބ. އޭދަފުށީގައި ޤާއިމުކޮށްފައިވާ ފުޓްސަލްދަނޑުގެ ފެންސް މަރާމާތުކޮށްދޭނެ ފަރާތެއް ހޯދަން ރަށު ކައުންސިލުން އިއުލާން ކޮށްފި އެވެ.
އޭދަފުށީ ކައުންސިލުން ކޮށްފައިވާ އިއުލާނެއްގައި ބުނެފައި ވަނީ ފުޓްސަލް ދަނޑުގައި ޖަހާފައިވާ ފެންސް ހަލާކުވެފައިވާތީ، ފެންސް މަރާމާތު ކުރުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުސަތު އަންނަ ބުރާސްފަތި ދުވަހާ ހަމައަށް ދީފައިވާ ކަމަށެވެ.
އެ އިދާރާއިން ބުނީ މިކަމާ ބެހޭ ގޮތުން މައުލޫމާތު ދިނުމަށް މާދަމާ 11:00 ގައި ކައުންސިލު އިދާރާގައި ބައްދަލުވުމެއް ބާއްވަން ހަމަޖެހިފައިވާ ކަމަށެވެ. އަދި ބައްދަލުވުމަށް ހާޒިރު ނުވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު ނޯންނާނެ ކަމަށް ވެސް ކައުންސިލު އިދާރާއިން ބުންޏެވެ.
ފުޓްސަލް ދަނޑުގެ ފެންސް މަރާމާތުކޮށްދޭނެ ބަޔަކު ހޯދަން އިއުލާން ކޮށްފައިވާއިރު، ދަނޑުގެ ގޯލް ފުރަގަހުގައި ޖަހާފައި ހުރި ފެންސްތަކާއި ބެންޗް މަތީގައި ހިޔާވާން އޮންނަ ޕްލާސްޓިކް ޝީޓްވެސް ބޭނުން ނުކުރެވޭ ވަރަށް ހަލާކުވެފައި ހުންނަތާ އެތައް ދުވަހެއް ވެއްޖެ އެވެ.
