ވަގު ޑޮލަރުގެ ވިޔަފާރުކުރާ ކަމުގެ ތުހުމަތުގައި ބ. އޭދަފުށިން މީހަކު ހައްޔަރުކޮށްފި އެވެ.
ފުލުހުންގެ މީޑިޔާ އޮފިޝަލު ވިދާޅުވީ މިދިޔަ ބުރާސްފަތި ދުވަހުގެރޭ 42 އަހަރުގެ ފިރިހެނަކު މިރަށުން ހައްޔަރުކޮށްފައިވާ ކަމަށާއި އެމީހާގެ ބަންދުގެ މުއްދަތަށް ދިހަ ދުވަހުގެ މުއްދަތެއް އޭދަފުށީ މެޖިސްޓްރޭޓް ކޯޓުން ޖަހައިދީފައިވާ ކަމަށެވެ. ނަމަވެސް އޭނާގެ ނަމެއް އަދި އޭނާގެ އަތުން ވަގު ޑޮލަރު ފެނިފައިވާ ކަމެއް ފުލުހުން އަދި ޔަގީނެއް ނުކޮށްދެ އެވެ.
އީޓީ އެނގިފައިވާ ގޮތުގައި މިދިޔަ ބުރާސްފަތި ދުވަހުގެރޭ މިރަށުން ހައްޔަރުކުރީ އޭދަފުއްޓަށް އުފަން ކުރީގެ މަޝްހޫރު ފުޓްބޯޅަ ކުޅުންތެރިޔާ މުހައްމަދު ޒާހިދު (ބައްޓޭ) އެވެ.
ބައްޓޭ ވަގު ޑޮލަރު ވިޔަފާރިކުރާ ކަމުގެ ތުހުމަތުގައި ހައްޔަރުކުރި އިރު، މިދިޔަ ރޯދަމަހު ވަގު ޑޮލަރުގެ ވިޔަފާރިކުރާ ކަމުގެ ތުހުމަތުގައި މިރަށުން ބިދޭސީންތަކެއްވެސް ހައްޔަރުކޮށްފައިވާކަން އީޓީ އަށް އެނގިފައިވެ އެވެ. އަދި ގިނަ އަދަދެއްގެ ވަގު ޑޮލަރު މިރަށުން ފެނިފައިވާކަންވެސް އެނގިފައިވެ އެވެ.
