އޭދަފުށި ޒުވާނުންގެ ކްލަބުން އިންތިޒާމްކޮށްގެން ބ.އަތޮޅުގެ ރިސޯޓްތަކަށް ހުޅުވާލަައިގެން ކުރިޔަށް ގެންދާ އިންޓަރ ރިސޯޓް ފުޓްބޯޅަ މުބާރާތުގެ ފެށުން ޓީ.އެސް.އެމް.އައި.ސީ (އަމިއްލަފުށި) ރަގަޅުކޮށްފިއެވެ.
މިއަދު ހަވީރު އޭދަފުށީ ފުޓްބޯޅަ ދަނޑުގައި ކުޅުނު މި މެޗް ޓީ.އެސް.އެމް.އައި.ސީ ކާމިޔާބު ކުރީ 1-3 ގެ ނަތީޖާއަކުންނެވެ. މި މެޗްގައި ފުރަތަމަ ލަނޑު ޖަހާކުރި ކުރިހޯދީ ކިހާދުއްފަރު ރިސޯޓްއިންނެވެ. މި ލަނޑު އެޓީމަށް ކާމިޔާބު ކޮށްދިނީ މެޗުގެ 8 ވަނަ މިނިޓްގައި އަބްދުﷲ އަބްދުލް ވައްޙާބްއެވެ. ނަމަވެސް ފުރަތަމަ ހާފް ނިމެން ކުޑަތަން ވެފައި ވަނިކޮށް ޓީ.އެސް.އެމް.އައި.ސީގެ ހުސައިން ޝިފާހް ވަނީ ލަނޑެއް ޖަހާ މެޗުގެ ނަތީޖާ ހަމަހަަމަކޮށްފައެވެ.
މި މެޗްގެ އަނެއް 2 ލަނޑު ފެނިގެން ދިޔައީ ދެވަނަ ހާފްގައެވެ. މެޗުގެ 57 ވަނަ މިނިޓްގައި ޓީ.އެސް.އެމް.އައި.ސީގެ ހަސަން ސުޖާން ވަނީ އެޓީމްގެ 2 ވަނަ ލަނޑުޖަހާ ނަތީޖާ ބަދަލްކޮށްލާފައެވެ. އެޓީމުގެ 3 ވަނަ ލަނޑު މެޗުގެ 69 ވަަނަ މިނިޓްގައި ކާމިޔާބް ކޮށްދިނީ މޫސާ ފަޔާޒްއެވެ.
މި މުބާރާތުގެ 2 ވަނަ މެޗުގައި މާދަމާ ހަވީރު ބައްދަލު ކުރާނީ ސޮނެވާފުށި ރިސޯޓްއާއި ދުސިތް ތާނީ ރިސޯޓްއެވެ. މި މެޗް ފަށާނީ މާދަމާ ހަވީރު 4:15 ގައެވެ.
މި މުބާރާތުގެ އޮންލައިން މީޑިޔާ ޕާޓްނަރަކީ އީޓީ އެވެ.
