ބ. އަތޮޅުގެ ރިސޯޓުތަކަށް އަމާޒުކޮށްގެން ބޭއްވި ފަސްވަނަ އިންޓަރ ރިސޯޓް ފުޓްބޯޅަ މުބާރާތުގެ މޮޅު ކުޅުންތެރިޔާގެ މަޤާމް ދުސިތް ތާނީ މޯލްޑިވްސް ޓީމުގެ އަޙްމަދު ލަޠީފް (ލައްޗޭ) ހޯދައިފިއެވެ.
މޮޅު ކުޅުންތެރިޔާގެ އިތުރުން ލައްޗޭ ވަނީ މުބާރާތުގެ އެންމެ މޮޅު މިޑްފީލްޑް ގެ މަޤާމުވެސް ހޯދާފައެވެ.
މުޅި މުބާރާތުގައިވެސް މެދުތެރެއިން މޮޅު ކުޅުމެއް ދެއްކި ލައްޗޭ ވަނީ ދުސިތް ޓީމު ފައިނަލަށް ގެންދިއުމުގައި މުހިއްމު ދައުރެއް އަދާކޮށްފައެވެ. ދުސިތް ޓީމު ފައިނަލުގައި ބަލިވީ ޓީ.އެސް.އެމް.އައި.ސީ އާއި ވާދަކޮށް ޕެނަލްޓީ ޖަހައިގެންނެވެ.
ލައްޗޭ ވަނީ މީގެ ކުރިން އެއްވަނަ ޑިވިޝަންގައި ވާދަކުރި އޯލް ޔޫތް ލިންކޭޖް (އޭވައިއެލް) އަށް ވެސް ކުޅެފައެވެ. އެއްވަނަ ޑިވިޝަން ފުޓްބޯޅައިގައި ދެއަހަރު ކުޅުމަށްފަހު ލައްޗޭ ފެނިގެންދަނީ އަތޮޅު ފެންވަރުގެ މުބާރާތްތަކާއި ޒޯން ފުޓްބޯޅަ މުބާރާތްތަކުގައެވެ. އެއްވަނަ ޑިވިޝަންގެ ފުޓްބޯޅައިން ލައްޗޭ ދުރަށް ދިޔައީ އޭނާއަށް ދިމާވި އަނިޔާގެ މައްސަލަތަކާއި ގުޅިގެންނެވެ. މެދުތެރެއިން އަބަދުވެސް މޮޅަށް ކުޅޭ ލައްޗޭ އަކީ އޭދަފުށީ ފުޓްބޯޅަ ޓީމުގެވެސް މުހިއްމު ކުޅުންތެރިއެކެވެ.