ރާއްޖެއަށް މިހާރު ކުރަމުންދާ ވިއްސާރަ އާ ގުޅިގެން ރ އަތޮޅާއި ލ އަތޮޅާ ދެމެދުގެ ރަށްތަކަށް ވައިޓް އެލާޓް ނެރެފި އެވެ
މޫސުމާ ބެހޭ ގައުމީ އިދާރާއިން ބުނީ ރ އަތޮޅާއި ލ އަތޮޅުގެ ރަށްތަކަށް ހެނދުނު 11:30 އިން ފެށިގެން ހަވީރު 4:30 ވަންދެން ވައިޓް އެލާޓް ނެރެފައިވާ ކަމަށެވެ.
މެޓުން ބުނި ގޮތުގައި މި ވިއްސާރައިގައި މި ސަރަހައްދުތަކަށް ބޯކޮށް ވާރޭވެހި ވިލާގަނޑުގައި ގާތްގަނޑަކަށް 45 މޭލު ބާރުމިނުގައި ވައި ޖެހޭނެ ކަމަށް ލަފާ ކުރެވޭ ކަމަށެވެ.
މި އެލާޓްގައި މޫސުމަށް ސަމާލުވާންޖެހެއެވެ. ކޮންމެވެސް ވަރަކަށް ވައިގަދަވެ، ވާރޭ ވެހި، އާންމު ގޮތެއްގައި ކަނޑުތައް ގަދަ ވާނެއެވެ.
އެހެންވެ، ކަނޑުދަތުރުފަތުރު ކުރާއިރު މޫސުމަށް ހާއްސަ ސަމާލު ކަމެއް ދޭން މެޓް އޮފީހުން އިލްތިމާސް ކުރެއެވެ.
ރާއްޖޭގެ ބޮޑު ބަޔަކަށް ވިއްސާރަ ކުރަން ފަށާފައި މިވަނީ ހޫނު ގަދަ ދުވަސްތަކަށް ފަހު އެވެ. މެޓް އޮފީހުން ބުނީ މި ވިއްސާރައިގެ އަސަރު އެންމެ ބޮޑަށް ކުރާނީ މެދު ރާއްޖެ ތެރެއާއި ދެކުނުގެ އަތޮޅުތަކަށް ކަމަށެވެ.
