ދުސިތް ތާނީ ރިސޯޓްގެ އިންޓަރ ޑިޕާޓްމަންޓް ފުޓްސަލް މުބާރާތް ރޭ ފަށައިފިއެވެ. މި މުބާރާތުގައި ޖުމްލަ 8 ޓީމު ވާދަ ކުރެއެވެ. އެއީ ފްރަންޓް އޮފީސް އޭ، ޓީމް އެހް.އާރު، އެފްސީ މޮޕް ހެޑް، ޓިއާ މަރިޔާ އެފްސީ، އެފްސީ ޓޮއިލެޓް ބޯވްލްސް، އެފް.އެން.ބީ، ފްރަންޓް އޮފީސް ބީ އަދި ޓީމް ބީޑީއެވެ. މި މުބާރާތް ކުޅުމަށް ހަމަޖެހިފައިވަނީ 2 ގްރޫޕް އަކަށް ބަހާލައިގެންނެވެ.
މި މުބާރާތުގެ ފުރަތަމަ މެޗްގައި ރޭ ބައްދަލުކުރީ އެންމެ ފަހުގެ ޗެންޕިއަން ފްރަންޓް އޮފީސް ބީ ޓީމާއި އެޗް އާރު ޓީމެވެ. މި މެޗް 3-8 ގެ ނަތީޖާއަކުން ކާމިޔާބުކުރީ ފްރަންޓް އޮފީސް ބީ ޓީމެވެ. ރޭ ކުޅުނު ދެވަނަ މެޗްގައި ވާދަކުރީ ޓިއާ މާރިއާ އާއި ޓޮއިލެޓް ބޯވްލްސްއެވެ. މި މެޗް 1-7 ގެ ތަފާތު ބޮޑު ނަތީޖާއަކުން ކާމިޔާބުކުރީ ޓިއާ މާރިއާ ޓީމެވެ.
ދުސިތް ތާނީ ރިސޯޓްގެ އެޗް.އާރު ކޯޑިނޭޓަރ ނަސީހް އަބްދުއް ސަމަދް އީޓީއަށް މައުލޫމާތު ދެމުން ވިދާޅުވީ މިމަހު 1 އަކުން 9 ވަނަ ދުވަހުގެ ނިޔަލަށް ކުރިޔަށް ގެންދިޔުމަށް ހަމަޖެހިފައިވާ މިމުބާރާތުގެ މަޤްސަދަކީ ސްޓާފުންގެ މެދުގައި އޮންނަ ގުޅުން އިތުރަށް ބަދަހި ކުރުމަށާއި ކުޅިވަރުގެ ރޫޙް އަލާ ކުރުމަށް ކަމަށެވެ.
