ޑައުންޓައުން ގްރޫޕުން އިސްނަގައިގެން ބާއްވާ ވުމެންސް ފުޓްސަލް މުބާރާތް މިރޭ ފަށައިފިއެވެ. 2 ގްރޫޕަކަށް ބަހާލައިގެން ކުރިޔަށްގެންދާ މި މުބާރާތުގައި މިރޭ ވަނީ 4 މެޗެއް ކުޅެފައެވެ.
މިރޭ ކުޅުނު ފުރަތަމަ މެޗުގައި ބައްދަލުކުރީ ހުސްސޮގުންނާއި ވެލާ ސިޓީއެވެ. މި މެޗް 0-3 ގެ ނަތީޖާއަކުން ކާމިޔާބު ކުރީ ހުސްސޮގުން ޓީމުންނެވެ. ހުސްސޮގުން ޓީމުގެ ލަނޑުތަށް ކާމިޔާބުކޮށްދިނީ ފާތިމަތު ޝަފްނާ އަދި އައިޝަތު ރަޝީދާއެވެ. މި މެޗްގައި އައިޝަތު ރަޝީދާވަނީ 2 ލަނޑު ޖަހާފައެވެ.
ޔުނައިޓެޑް ވީ އާއި އެފްސީ ހަމަދޫކޮށްލީ ބައްދަލުކުރި މެޗް ނިމުނީ 0-7 ގެ ތަފާތު ބޮޑު ނަތީޖާއަކުން ޔުނައިޓެޑް ވީ މެޗު ކާމިޔާބުކޮށްގެންނެވެ. މި މެޗްގައި ޔުނައިޓެޑް ވީ ގެ ލަނޑުތަށް ކާމިޔާބު ކޮށްދީފައިވަނީ އައިމިނަތު ރީނާ، ޝަހުލާ އަލީ އަދި ޝަހްމާ އަބްދުއްރަޙްމާންއެވެ. ޝަހްމާ ވަނީ މި މެޗްގައި 5 ލަނޑު ކާމިޔާބުކޮށްފައެވެ.
މިރޭ ކުޅުނު ތިންވަނަ މެޗްގައި ބައްދަލުކުރީ އިރުމަތީ ލަވާރސް ފެމިނާ އާއި ރުވާ ސްޕޯޓްސް އެވެ. މި މެޗް އިރުމަތީ ލަވާރސް ފެމިނާ އިން ކާމިޔާބު ކުރީ 1-2 ގެ ނަތީޖާއަކުންނެެވެ. މި މެޗްގައި އިރުމަތީ ލަވާރސް ފެމިނާ ޓީމުގެ 2 ލަނޑުވެސް ކާމިޔާބުކޮށްދިނީ ފާތިމަތު ޒާހިރާއެވެ. ރުވާ ސްޕޯޓްސް އިން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ ސުވައިދާ އަބްދުއް ޝަކޫރްއެވެ.
މިރޭ ކުޅުނު ފަހު މެޗުގައި ބައްދަލުކުރީ ޕްރެގް ލޭޑީޒް އާއި ފްރެންޑްސް ޓީމެވެ. މި މެޗް 2-3 ގެ ނަތީޖާއަކުން ކާމިޔާބުކުރީ ޕްރެގް ލޭޑީސް ޓީމުންނެވެ. ޕްރެގް ލޭޑީޒް ޓީމުގެ ލަނޑުތަށް ކާމިޔާބުކޮށްދިނީ އާލިމާ ހުސައިން، އައިޝަތު ދިފްލާ އަދި މީޒާ އަބްދުލްއަޒީޒެވެ. ފްރެންޑްސް ޓީމުގެ ލަނޑުތަށް ކާމިޔާބުކޮށްދިނީ މުނީރާ އުމަރު އަދި ފާތިމަތު ޒީނިޔާއެވެ.
މި މުބާރާތުގައި މާދަމާރޭވެސް 4 މެޗެއް ކުޅުމަށްވަނީ ހަމަޖެހިފައެވެ.
20:00 މަގޫ ސްޓާރސް – ހުސްސޮގުން
20:45 އަގްލިއޯ އޮލިއޯ – ޔުނައިޓެޑް ވީ
21:30 ވެލާ ސިޓީ – އިރުމަތީ ލަވާރސް ފެމިނާ
22:15 އެފްސީ ހަމަދޫކޮށްލީ – ޕްރެގް ލޭޑީސް
މި މުބާރާތުގެ ސެމީ ފައިނަލް މެޗްތަށް ކުޅުމަށް ހަމަޖެހިފައިވަނީ 14 ވަނަ ދުވަހުގެ ރެއެވެ. އަދި ފައިނަލް މެޗް އޮންނާނީ 15 ވަނަ ދުވަހުރެއެވެ.