މިނިވަން ފުޓްބޯޅަ މުބާރާތުގެ ޒޯން 3 ގެ ފަހު މެޗުގައި މިއަދު އޭދަފުއްޓާއި ނައިފަރު ބައްދަލުކުރާނެއެވެ.
މި މުބާރާތުގައި މިހާތަނަށް ދެމެޗު ކުޅެފައިވާއިރު އިންނަމާދޫ އަދި އޭދަފުށި ވަނީ 3 ޕޮއިންޓް ހޯދާފައެވެ. ނައިފަރަށް އަދި ޕޮއިންޓެއް ލިބިފައި ނުވާއިރު މިއަދު އޭދަފުއްޓާ ބައްދަލުކުރާ މެޗުން މޮޅުވާން އެޓީމަށް މަޖުބޫރެވެ.
މިއަދުގެ މެޗު އެއްވަރު ކޮށްލައިގެންވެސް އޭދަފުއްޓަށް ޒޯންގެ ތަށި ޔަގީންވާނެއެވެ. ނައިފަރަށް މުބާރާތުގެ ޗެމްޕިއަންކަން ލިބޭނީ އޭދަފުށި 3 ގޯލުގެ ތަފާތުން ބަލިކޮށްގެންނެވެ. މުބާރާތުގެ ފުރަތަމަ މެޗުގައި އޭދަފުއްޓާ އިންނަމާދޫ ބައްދަލުކުރި މެޗު 4-1 އިން ކާމިޔާބު ކުރީ އޭދަފުއްޓެވެ. ދެވަނަ މެދުގައި އިންނަމާދޫ އަދި ނައިފަރު ވާދަކޮށް 2-0 އިން މެޗު ކާމިޔާބު ކުރީ އިންނަމާދޫއެވެ.
އޭދަފުށީ ޓީމުން ބުނީ، އެއްވަރުވެގެން ޗެމްޕިއަންކަން ލިބެން އޮތަސް އެގޮތަށް ނުވިސްނާނެ ކަމަށެވެ.
” އެއްވަރު ކުރާކަށް ނުވިސްނާނަން، ބޭނުންވަނީ %100 ރެކޯޑަކާއެކު މުބާރާތް ނިންމާލަން. މިއަދުވެސް ކުޅޭނީ ހަމަ މޮޅުވާންޖެހޭ މެޗެއް ގޮތަށް ވިސްނައިގެން. ޓީމުގެ ކުޅުންތެރިންވެސް ތިބީ އެ ރޫހުގަ ” ޓީމުގެ މެނޭޖަރ ޢަބްދުލް މަޖީދު ޙަސަން ވިދާޅުވިއެވެ.
ނައިފަރު ޓީމުން ފޯނަށް ޖަވާބު ނުދޭތީ އެޓީމުގެ ބަހެއް ލިބޭގޮތް ވަނީ ނުވެފައެވެ.
ޒޯން 3 ގައި ހިމެނެނީ ރ. ބ އަދި ޅ އަތޮޅެވެ. މިދިޔަ އަހަރު ޒޯން މުބާރާތުގެ ޗެމްޕިއަން ޓީމަކީ އޭދަފުއްޓެވެ. އޭދަފުށީ ރަސްމީ ފުޓްބޯޅަ ދަނޑުގައި މިއަދުގެ މެޗު ފަށާނީ 15:45 ގައެވެ. މި މެޗުގެ ލައިވް އަޕްޓޭޑްސް ވެސް “އީޓީ” އިން ގެނެސްދޭނެ އެވެ.
