ބ. އަތޮޅު ކައުންސިލުގެ އޭދަފުށީ ދާއިރާގެ މެމްބަރު މަބްރޫކް ނަސީރު އަންނަ ލޯކަލް ކައުންސިލު އިންތިހާބުގައިވެސް އޭދަފުށީ ދާއިރާއަށް ކުރިމަތިލައްވާނެކަން ހާމަކުރައްވައިފި އެވެ.
އެމްޑީޕީ ޓިކެޓްގައި މިދިޔަ އިންތިހާބުގައި އޭދަފުށީ ދާއިރާއަށް ހޮވިވަޑައިގެންނެވި އަދި މިހާރުގެ ކައުންސިލުގެ ނައިބް ރައީސް މަބްރޫކް ނަސީރު ދެވަނަ ދައުރަކަށް ކުރިމަތިލައްވާނެކަން އާންމުކުރެއްވީ އޭނާ މިއަދު ކުރެއްވީ ޓްވީޓެއްގަ އެވެ.
Kuriyah oi local council inthihaabugai Eydhafushi dhaaira in Baa Atholhu Council ah alhugandu kurimathilavahaka danavan
— Mabrook Eydhafushi (@Mabroook) September 28, 2016
ކުރިއަށްއޮތް ލޯކަލް ކައުންސިލް އިންތިހާބުގައި އޭދަފުށީ ދާއިރާއަށް މަބްރޫކުގެ އިތުރުން މިރަށު ތަރިވިދިގޭ އަބްދުﷲ އަޝްރަފުވެސް ކުރިމަތިލައްވާނެކަން ވަނީ ހާމަކޮށްފަ އެވެ.
އީޓީއަށް އެނގިފައިވާ ގޮތުގައި އަޝްރަފު ކުރިމަތިލައްވަނީ ޕީޕީއެމްގެ ޓިކެޓްގަ އެވެ.
ލޯކަލް ކައުންސިލު އިންތިހާބަށް ކުރިމަތިލުމުގެ ފުރުސަތު ހުޅުވާލާނީ އަންނަމަހުގެ 26 ގަ އެވެ. އިލެކްޝަންސް ކޮމިޝަނުގެ ކަލަންޑަރުގައިވާ ގޮތުން ކައުންސިލް އިންތިހާބު އޮންނާނީ އަންނަ އަހަރުގެ ޖެނުއަރީ 14 ގަ އެވެ.
ލޯކަލް ކައުންސިލް އިންތިހާބު ބޯމަތިވެފައި ވަނިކޮށް މަޖިލީހުން ފާސްކުރި އިސްލާހުގައިވާ ގޮތުން ބ. އަތޮޅު ކައުންސިލްގެ މެމްބަރުން އިންތިހާބު ކުރާއިރު، މި އަތޮޅު ކައުންސިލަކަށް އިންތިހާބުކުރާނީ ކޮންމެ އިންތިހާބީ ދާއިރާއަކުން އެއް ކައުންސިލަރެކެވެ. އެހެންކަމުން މިފަހަރުގެ އިންތިހާބު ވަރަށް ވާދަވެރިވާނެކަމަށް ބެލެވެ އެވެ.