ބ. އޭދަފުށީ ދާއިރާގެ މެންބަރު އަހްމަދު ސަލީމް (ރެޑްވޭވް ސަލީމް) ބ. މާޅޮހު ކަނޑުތޮށިލުމުގެ މަޝްރޫއަށާއި ބ. އަތޮޅު ތައުލީމީ މަރުކަޒު ޑިޖިޓަލް ކުރުމުގެ މަޝްރޫއުއަށް އެހީތެރިވެދެއްވައިފި އެވެ.
މާޅޮހު ކަނޑުތޮށި ލުމުގެ މަޝްރޫއު އަށް އެރަށު ކައުންސިލުގެ އެދިވަޑައިގަތުމަކަށް، ސަލީމު ވަނީ 150 ކޮތަޅު ސިމެންތި ހަދިޔާ ކުރައްވާފަ އެވެ. އަދި ބ. އަތޮޅު ތައުލީމީ މަރުކަޒުގެ ކްލާސްރޫމުތައް ޑިޖިޓަލް ކުރުމަށް ހިންގާ މަޝްރުއޫއަށް އެހީތެރިވެދިނުމުގެ ގޮތުން ސަލީމު ވަނީ މިއަދު އެ ސްކޫލަށް 50 އިންޗީގެ ޓީވީއެއްވެސް ހަދިޔާ ކުރައްވާފަ އެވެ.
ސަލީމު ވިދާޅުވި ގޮތުގައި ދާއިރާގެ ކުރިއެރުމަށާއި ތަރައްގީއަށް ރައްޔިތުން އެދުނު ކޮންމެ ކަމެއް ކުރެއްވުމަށް ސަރުކާރުގެ ތެރެއިންނާއި އެހެން ފަރާތެއް މެދުވެރިވެގެން ނަމަވެސް ނުވަތަ އަމިއްލަ ގޮތުން ކޮށްދޭންޖެހޭ ކަމެއް ކަމުގައި ވިޔަސް އެކަން ކޮށްދިނުމަށް ކުރެވެންހުރި ހުރިހާ މަސައްކަތްތަކެއް އޭނާ ކޮށްދެއްވާނެ އެވެ.
އަދި ކުރިއަށް އޮތްތަނުގައިވެސް މަޖިލީހުގެ އެތެރެއާއި ބޭރުގައިވެސް މަސައްކަތްކުރައްވަމުން ގެންދަވާނީ ރައްޔިތުންގެ ޚިޔާލާއި ވިސްނުމާއެކު ރައްޔިތުންނަށް ފައިދާހުރި ކަންތައްތައް ކޮށްދިނުމަށް ކަމަށް ސަލީމު ވިދާޅުވި އެވެ.
“ދާއިރާގެ ރައްޔިތުން އަޅުގަނޑު އިންތިޚާބު ކޮށްފައިވަނީ މިދެންނެވި މަސައްކަތް ކުރަންކަން އަޅުގަނޑު ހަނދާން ނައްތައެއް ނުލާނަން،” ސަލީމު ވިދާޅުވި އެވެ.
2009 ވަނަ އަހަރުން ފެށިގެން ރައްޔިތުންގެ މަޖިލީހުގެ އޭދަފުށީ ދާއިރާގެ ގޮނޑި ފުރުއްވަމުންދަވާ ސަލީމު ގެންދަވަނީ އާއްމުންނަށް އެކިގޮތްގޮތުން އެހީތެރިކަން ފޯރުކޮށްދެމުންނެވެ.