ނަތީޖާ އިއުލާންކޮށް ޓްރޮފީ އާއި ހަނދާނީ ލިޔުން ދިން ފަހުން، ބ. އަތޮޅު ކައުންސިލުން ބޭއްވި އަތޮޅު ގުރުއާން މުބާރާތުގެ ނަތީޖާ ބަދަލުވެއްޖެ އެވެ.
ބ. އަތޮޅު ކައުންސިލުން މިހާރު އިއުލާން ކޮށްފައިވާ ގޮތުން މި މުބާރާތުން ދެވަނަ ލިބެނީ، ކުރިން ތިންވަނަ ލިބުނު އޭދަފުށީ ކައުންސިލެވެ. އަދި ކުރިން ދެވަނަ ލިބުނު ކެންދުއަށް ލިބުނީ މުބާރާތުން ތިން ވަނަ އެވެ.
ބ. އަތޮޅު ކައުންސިލުން ބުނި ގޮތުގައި ނަތީޖާއަށް ބަދަލު އައިސްފައި މިވަނީ ޑޭޓާ ޝީޓްތައް އެންޓަރ ކުރުމުގައި އެރި އިދާރީ އޮޅުމަކުންނެވެ. ނަމަވެސް މިކަމުގެ ސަބަބުން އެއްވެސް ބައިވެރިއަކަށް ލިބިފައިވާ މާކްސް އަކަށް ބަދަލު ނާންނަ ކަމަށް އަތޮޅު ކައުންސިލުން ބުންޏެވެ.
“މިއީ ދިމާވި އިދާރީ މައްސަލައެއް، އެކަން އަޅުގަނޑުމެންނަށް ފާހަގަވެގެން ކައުންސިލުތަކާ ވެސް ވަގުތުން ވާނީ އަންގާފައި، މިއީ އެއްވެސް ކުއްޖެއްގެ މާކްސް އޮޅިގެން ދިމާވި ކަމެއް ނޫން،” ކައުންސިލުން ވާހަކަދެއްކި އޮފިޝަލް ވިދާޅުވި އެވެ.
ބ. އަތޮޅުގެ ގުރުއާން މުބާރާތުގެ އެއް ވަނަ ޖެހިޖެހިގެން ދެވަނަ ފަހަރަށް ހޯދީ ތުޅާދޫ ކައުންސިލުންނެވެ.
ބ. އަތޮޅު ކައުންސިލުން އިންތިޒާމުކޮށްގެން މި މަހުގެ 2-4 އަށް ތުޅާދޫގައި ބޭއްވި ގުރުއާން މުބާރާތުގައި މިއަތޮޅުގެ ދިހަ ރަށަކުން ޖުމްލަ 147 ދަރިވަރުން ވާދަކޮށްފައިވާ އިރު، މުޅި މުބާރާތުގެ ފޮތުން ކިޔެވުމުގެ ބައިން އެއްވަނަ ހޯދާފައި ވަނީ ދަރަވަންދޫ ކައުންސިލުގެ ދާނިޝް ބިން މުހައްމަދު ފަތުހީ އެވެ. ހިތުން ކިޔެވުމުގެ ބައިން މުޅި މުބާރާތުން އެއްވަނަ ލިބުނީ ތުޅާދޫ ކައުންސިލުގެ ފާތުމަތު ނިޝްޔާ ޝުޖާއު އަށެވެ.
މި މުބާރާތުގައި ހުރިހާ ކީ ސްޓޭޖްތަކެއް ވަކިން ވެސް ވަނަތައް ވަނީ ހޮވައި އިނާމުދީފަ އެވެ.
ބ. އަތޮޅު ކައުންސިލުން ބުނީ މި މުބާރާތް ކޮންމެ އަހަރަކު ބޭއްވުމުގެ ބޭނުމަކީ، ގައުމީ މުބާރާތަށް ކުދިން ހޮވުމުގެ އިތުރުން މިއަތޮޅުގައި ގުރުއާނަށް ލޯބި ޖެހިފައިތިބި ދަރިންތަކެއް އުފެއްދުން ކަމަށެވެ.
ބ އަތޮޅު ކައުންސިލުން ކަޓު ވިސްނުން ދޫކުރަން ފެނޭ. ރާއްޖޭގެ ހުރިހާ އަތޮޅެއްގައި އެ ރަށެއްގެ ސްކޫލްތައް ވާދަވެރިކަމާއެކު ތަމްސީލްކުރި އިރު ކީސްޓޭޖްތައް ހަދައިގެން ރަށު ކައުންސިލްތައް މޮޔަ ހެއްދީ. އަތޮޅުގެ ތަޢުލީމު ކުރިއަރުވަން ތިޔަ އަތޮޅު ކައުންސިލުން ކުރާ ކަމެއް އެނގޭ މީހަކު ހުރިއްޔާ ބުނެލަ ދީބަލަ. ފެށުން ގޯސްކޮށް ދިޔަ ކަމެއް ނިމިގެން ވެސް ތިޔަ ދިޔައީ ތިހެން.