މާލެ (މިހާރު) – އެޕަލްއިން އެންމެ ފަހުން ތަޢާރަފުކުރި އައިފޯން 16 ސީރީޒްގެ ފޯނުތަކަށް ޕްރީ-އޯޑަރ ކުރުމުގެ ފުރުޞަތު އުރީދޫ މޯލްޑިވްސްއިން މިރޭ ހުޅުވާލާނެ ކަމަށް އެ ކުންފުނިން ހާމަކޮށްފިއެވެ.
އުރީދޫއިން ބުނެފައިވާ ގޮތުގައި ޕްރީ-އޯޑަރ ކުރުމުގެ ފުރުޞަތު ހުޅުވާލާނީ މިރޭ 12:00 ގައެވެ. މި ކަމަށް ޚާއްޞަކޮށް އުރީދޫގެ ވެބްސައިޓުގައި ކައުންޓްޑައުނެއް ވެސް ފަށައިފައިވެއެވެ. އަދި ޕްރީ-އޯޑަރ ފެށުމާއެކު، އައިފޯނަށް ޚާއްޞަކޮށްފައިވާ އޮފަރތަކުގެ ތަފްޞީލު ހިއްސާކުރާނެ ކަމަށްވެސް އުރީދޫއިން މަޢުލޫމާތު ދީފައިވެއެވެ.
މި މަހުގެ 9 ވަނަ ދުވަހު ތަޢާރަފުކުރެވުނު އައިފޯން 16 ގައި ހިމެނެނީ އައު A18 ޗިޕެކެވެ. މި ފަހަރުގެ އެންމެ ބޮޑު އެއް އަޕްގްރޭޑްގެ ގޮތުގައި އެޕަލްއިން ފާހަގަކޮށްފައިވަނީ ކެމެރާ ކޮންޓްރޯލްގެ އައު ފީޗަރއެއްގެ ގޮތުގައި ތަޢާރަފުކޮށްފައިވާ އެކްޝަން ބަޓަނެވެ. މީގެ އިތުރުން، މި މޮޑެލްތަކަކީ ކުރީގެ މޮޑެލްތަކަށް ވުރެ ބެޓެރީ ލައިފް ރަނގަޅު ފޯނުތަކެއްގެ ގޮތުގައިވެސް އެޕަލްއިން ފާހަގަކޮށްފައިވެއެވެ.
އައިފޯން 16 އާއި އައިފޯން 16 ޕްލަސްގެ މޮޑެލްތައް ނެރެފައިވަނީ ކަޅު، ހުދު، ފިޔާތޮށި، ޓީލް އަދި އަލްޓްރާމެރިން ކުލަތަކުގައެވެ. އައިފޯން 16 ޕްރޯ އަދި ޕްރޯ މެކްސް ފޯނުތައް ނެރެފައިވަނީ ކަޅު، ޓައިޓޭނިއަމް، ވައިޓް ޓައިޓޭނިއަމްގެ އިތުރުން ނެޗުރަލް ޓައިޓޭނިއަމް އަދި ޑެޒާޓް ޓައިޓޭނިއަމް ކުލަތަކުގައެވެ.
