އެސްޓީއޯ މިނިވަން ޗެމްޕިއަންޝިޕްގެ ފައިނަލުގައި ރޭ 1-0 އިން ތ. ތިމަރަފުށި ބަލިކޮށް ޗެމްޕިއަންކަން ހޯދި އޭދަފުށީ ފިޓްބޯޅަ ޓީމު އެނބުރި މިއަދު ރަށަށް އަންނައިރު ހޫނު މަރުހަބާއެއް ތައްޔާރުވަމުން އެބަދެ އެވެ.
މި ހަރަކާތް އިންތިޒާމު ކުރާ ޓާސްކް ފޯސްގައި އިސްކޮށް އުޅޭ އަހްމަދު ނާސިރު ބުނި ގޮތުގައި ޓީމަށް މަރުހަބާ ކިޔުމަށްޓަކައި ރަށުކައުންސިލާ ރައްޔިތުންނާ ގުޅިގެން ތައްޔާރުވަމުން އަންނަ ކަމަށެވެ.
މިއަދު މެންދުރުފަހު 4 ޖަހާއިރު ރަތް ކުލައިގެ ހެދުމެއްގައި ރަސްމީ ފާލަން ދޮށަށް ވީހާވެސް ގިނަ ބަޔަކު ދިއުމަކީ ޓާސްކް ފޯހުގެ އެދުމެކެވެ.
ރޭގެ ފައިނަލު މެޗުގައި އޭދަފުށިން ލީޑުނެގީ މެޗުގެ ނުވަ ވަނަ މިނިޓްގަ އެވެ. މި މެޗުގައި ފެނިގެންދިޔަ ހަމައެކަނި ލަނޑު މިރަށު ޓީމަށް ކާމިޔާބު ކޮށްދިނީ ސާމީ އިބްރާހިމް އެވެ. އޭރިއާ ބޭރު އަރިމަތިން ސާމީ ފޮނުވާލި ބޯޅަ ގޯލަށް ވަނީ ތިމަރަފުށީގެ ކީޕަރު މުހައްމަދު ޝަރުހާން އަތްމަތިންނެވެ.
އޭދަފުށީ ޓީމު ހޯދި ކާމިޔާބީއާ ގުޅިގެން ސޯސިއަލް މީޑީއާ ގައިވެސް ގިނަ ބަޔަކު އެ ޓީމަށް ދަނީ މަރުހަބާ ކިޔަމުންނެވެ.
