ފޮޓޯތަކެއް ހުރިކަމަށް ބުނެ ޓެލެގްރާމް މެދުވެރިކޮށް ފޮނުވާ ޕިޝިންގ ލިންކުތައް ބޭނުންކޮށްގެން ޓެލެގްރާމް އެކައުންޓުތައް ހެކްކުރުމުގެ މައްސަލަތައް އިތުރުވަމުންދާކަން ފުލުހުންގެ ޚިދުމަތުން ބުނެފިއެވެ.
މިފަދަ ހެކްކުރުންތަކުން ރައްކާތެރިވުމަށް ފުލުހުން އަންނަނީ ތަކުރާރުކޮށް އިރުޝާދުދީ ހަނދާންކޮށްދެމުންނެވެ.
ފޮޓޯތަކެއް ހުރިކަމަށް ބުނެ ޓެލެގްރާމް މެދުވެރިކޮށް ފޮނުވާ ޕިޝިންގ ލިންކުތައް ބޭނުންކޮށްގެން ޓެލެގްރާމް އެކައުންޓުތައް ހެކްކުރުމުން ރައްކާތެރިވެ ތިބުމަށް ފުލުހުން ވަނީ އަންނަނިވި އިރުޝާދުތައް ދީފައެވެ.
ވަނީ ކިހިނެއް؟
ފުލުހުން ބުނާ ގޮތުގައި، މި ލިންކުތައް އަންނަނީ އިތުބާރުކުރެވޭ ފަރާތަކުން ފޮނުވާ މެސެޖަކާއެކުއެވެ. އެގޮތުން، ތިމާ ދަންނަ ނުވަތަ ގާތް މީހެއްގެ ނަމުގައި “ފޮޓޯތަކެއް” ނުވަތަ “ވީޑިއޯތަކެއް” ހުރިކަމަށް ބުނެ ލިންކެއް ފޮނުވާނެއެވެ. މި މެސެޖުގައިވާ ލިންކަށް ފިތައިލުމުން، ފޯނު ނަންބަރު ޖެހުމަށް އެދޭ ޞަފްޙާއަކަށް ގެންގޮސްދެއެވެ. ފޯނު ނަންބަރު އެޅުމުން، އެ ނަންބަރަށް އަންނަ ލޮގިން ކޯޑު ނުވަތަ އޯޓީޕީއެއް ހިއްސާކުރުމަށް އެދެއެވެ. މި އޯޓީޕީ ހިއްސާކޮށްފިނަމަ، ޓެލެގްރާމް އެކައުންޓުގެ ކޮންޓްރޯލް، ސްކޭމްކުރާ ފަރާތަށް ލިބިގެންދާނެއެވެ.
އެއަށްފަހު، އެކައުންޓު ސްކޭމަރުންގެ އަތްދަށުވުމުން، އެކައުންޓުގެ ވެރިފަރާތުގެ ނަމުގައި އެހެން މީހުންނަށްވެސް މިފަދަ ސްކޭމް ޕިޝިންގ ލިންކުތައް ފޮނުވަމުންދެއެވެ. މިއީ ސައިބަރ ކުށްތަކުގެ ދަށުން މިހާރު ފެންނަމުންދާ އާ ހެކްކުރުމުގެ އުސްލޫބެކެވެ.
ސްކޭމްގައި ޖެހި ޓެލެގްރާމް އެކައުންޓު ގެއްލިއްޖެނަމަ ހަދާނީ ކިހިނެއް؟
ޓެލެގްރާމް މެދުވެރިކޮށް ފޮނުވާ ޕިޝިންގ ލިންކު ސްކޭމްގެ ޝިކާރައަކަށްވެ، ޓެލެގްރާމް އެކައުންޓު ހެކްކޮށްފިނަމަ، ވަގުތުން ޓެލެގްރާމް އެޕްލިކޭޝަން އަންއިންސްޓޯލްކުރުމަށް ފަހު އަލުން އިންސްޓޯލްކޮށްލުމަށް ފުލުހުން އިރުޝާދުދެއެވެ. އަދި ޓެލެގްރާމް އަލުން އެކްޓިވޭޓްކޮށް، ޓޫ-ސްޓެޕް ވެރިފިކޭޝަން (Two-Step Verification) އެކްޓިވޭޓް ކުރުމަކީ ވަރަށް މުހިންމު ކަމެކެވެ.
ޓޫ-ސްޓެޕް ވެރިފިކޭޝަން ހަދާނެގޮތް:
ޓެލެގްރާމް އެކައުންޓު ރައްކާތެރިކުރުމަށްޓަކައި، ޓޫ-ސްޓެޕް ވެރިފިކޭޝަން އެކްޓިވޭޓްކުރުމަކީ ރައްކާތެރިވުމަށް އެޅޭނެ އެންމެ މުހިންމު އެއް ފިޔަވަޅެވެ. މިކަން ކުރާނެ ގޮތް ތިރީގައި މިވަނީއެވެ:
- ޓެލެގްރާމް ސެޓިންގ (Settings) އަށް ދިއުން.
- ޕްރައިވަސީ އެންޑް ސެކިއުރިޓީ (Privacy and Security) އަށް ފިތާލުން.
- ޓޫ-ސްޓެޕް ވެރިފިކޭޝަން (Two-Step Verification) އެކްޓިވޭޓްކުރުން.
- ސެކިއުރިޓީ ވަރުގަދަ ޕާސްވޯޑެއް ބޭނުންކުރުން.
- ރިކަވަރީ އީމެއިލް އެޑްކުރުން.
ފުލުހުން އިލްތިމާސްކުރަނީ، އިތުބާރުކުރެވޭ ނުވަތަ ގާތް މީހެއްގެ ނަމުގައި މިފަދަ ލިންކު ފޮނުވިކަމުގައިވިޔަސް އެއަށް ސަމާލުކަން ނުދިނުމަށެވެ. އެއީ ޓެލެގްރާމް އެކައުންޓް ސްކޭމަރުންގެ އަތްދަށުލުމަށް ފަރުމާކޮށްފައިވާ ފިޝިންގ ލިންކެކެވެ. އެހެންކަމުން މިފަދަ ލިންކުތަކަށް ނުފިތުމަށް އާންމުން ހޭލުންތެރިވެ ސަމާލުވުމަށް ފުލުހުންގެ ޚިދުމަތުން ވަނީ އިލްތިމާސްކޮށްފައެވެ.
