އަތޮޅުގެ ރަށްތަކަށް ދައުވަތު ދީގެން “ދޮންފަނު އިންވިޓޭޝަން ކަޕް” 23 އަހަރުން ދަށުގެ ފުޓްބޯޅަ މުބާރާތް ހުޅުމުވުމުގެ ގޮތުން މިއަދު ދޮންފަނާއި ކިހާދޫ ބައްދަލުކުރި މެޗު އެއްވަރުވެއްޖެ އެވެ. މިއަދު ހަވީރު ދޮންފަނު ފުޓްބޯޅަ ދަނޑުގައި ކުޅުނު މިމެޗު އެއްވަރުވީ 1-1 އިންނެވެ.
މެޗުގެ ފުރަތަމަ ގޯލް ފުރަތަމަ ހާފްގައި ޖެހީ ދޮންފަނުންނެވެ. މި ގޯލް އެޓީމަށް ކާމިޔާބުކޮށްދިނީ އަޙްމަދު އިޔާޒް އެވެ. ނަމަވެސް ކިހާދޫ ޓީމުން ވަނީ މެޗުގެ ދެވަނަ ހާފުގައި ނަތީޖާ ހަމަހަމަ ކޮށްފައެވެ. މި ގޯލު ކިހާދޫ ޓީމަށް ކާމިޔާބު ކޮށްދިނީ މެޗުގެ މޮޅު ކުޅުންތެރިޔާގެ މަގާމް ހޯދި ޙުސައިން އިކްލީލް އެވެ. މި މެޗުގައި ދެޓީމަށް ވެސް ލަނޑު ޖަހާނެ ފުރުސަތުތައް ލިބި ވަނީ ބޭކާރުވެފައެވެ. އަމިއްލަ ފަސްގަނޑުގައި ދޮންފަނުން މިއަދުގެ މެޗުގައި ވަނީ މޮޅަށް ކުޅެ ގިނަ ފުރުސަތުތަކެއް ތަނަވަސްކޮށްފައެވެ.
މި މުބާރާތުގައި މާދަމާ ކުޅޭ މެޗުގައި ބައްދަލުކުރާނީ މާޅޮހާއި އަދި ދަރަވަންދޫއެވެ. މި މުބާރާތް ކުރިއަށް ދާނީ ކޮންމެ ޓީމެއް ކޮންމެ ޓީމަކާއި ވާދަކޮށް އެންމެ ގިނަ ޕޮއިންޓް ހޯދާ ޓީމު ފައިނަލަށް ދާގޮތަށެވެ. އަދި ފައިނަލުގެ ދެވަނަ ޖާގަ ލިބޭނީ ދެވަނަ އަދި ތިންވަނައަށް ދާޓީމުގެ މެދުގައި ކުޅޭ މެޗުން މޮޅުވާ ޓީމަކަށެވެ. މި މުބާރާތުގައި ޖުމްލަ ފަސް ރަށަކުން ވަނީ ބައިވެރިވެފައެވެ.