މޯލްޑިވްސް ފުޓްބޯލް އެވޯޑްސްގައި ހޮވި ރާއްޖޭގެ މިދިޔަ އަހަރުގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް ހޯދި އަލީ ފާސިރު (ސެންޓޭ) މިއަދު ހަވީރު އޭދަފުއްޓަށް އައުމުން ރަތްދޫލައިގެ މަރުހަބާއެއް ކިޔައިފި އެވެ.
ސެންޓޭ އަށް މަރުހަބާ ކިޔުމަށް އޭނާގެ އާއިލާގެ މެންބަރުންގެ އިތުރުން ރަށުގެ ޒުވާނުންނާއި ކުޑަކުދިން ހިމެނޭ ގޮތަށް ގިނަ އަދަދެއްގެ އާއްމުންވެސް ރަސްމީ ފާލަން ސަރަހައްދަށް އެއްވި އެވެ. ސެންޓޭ އަށް ލިބުނު ޝީލްޑްތަކާއެކު ގިނަ ބަޔަކު ވަނީ ފޮޓޯ ނަގައިފަ އެވެ.
މިދިޔަ ސީޒަނުގެ ދިވެހި ޕްރިމިއާ ލީގާއި އެފްއޭ ކަޕާއި ޕްރެޒިޑެންޓްސް ކަޕުގެ ދެ ވަނަ ހޯދި ޓީސީގައި ޖާޒީގައި ސެންޓޭ ވަނީ 34 ލަނޑު ޖަހައި ރަންބޫޓް ވެސް ހާސިލްކޮށްފަ އެވެ. މީގެ އިތުރުން ދިވެހި ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަޤާމްވެސް މިދިޔަ އަހަރު ހޯދީ ސެންޓޭއެވެ.
ސެންޓޭ އަށް މަރުހަބާ ކިޔަން އޭދަފުށީ ކްލަބް ކޮމްބިނޭޝަން ޖަމިއްޔާއިންނާއި ސެންޓޭގެ އާއިލާގެ އަދި ގާތް ރައްޓެހިން ގުޅިގެން ބާއްވާ ހާއްސަ ރަސްމިއްޔާތު އޮންނާނީ މިރޭ 9:00 ފައި ބ. އަތޮޅު ތަޢުލީމީ މަރުކަޒުގެ ހޯލުގަ އެވެ. އެ ރަސްމިއްޔާތުގެ ހާއްސަ މެހެމާނެއްގެ ގޮތުގައި ފުޓްބޯޅަ އެސޯސިއޭޝަން އޮފް މޯލްޑިވްސްގެ ރައީސް ބައްސާމް އަދީލް ޖަލީލު އިތުރުން ބައެއް ކޯޗުންވެސް މި ރަސްމީޔާތުގައި ބައިވެރި ވަޑައިގަންނަވާނެ އެވެ.