މާފުށީ ސްކޫލު ސީދާ ތިން ސެޓުން ބަލިކޮށް، އިންޓަރ ސްކޫލު ވޮލީބޯޅަ މުބާރާތުގެ މިދިޔަ އަހަރުގެ ފައިނަލުގައި ބަލިވި ބަލިވުމުގެ ބަދަލު ހިފައި، 16 އަހަރުން ދަށުގެ (ފިރިހެން) ވޮލީބޯޅަ މުބާރާތުގެ ތަށިވެސް ގޮއިދޫ ސްކޫލުން ހޯދައިފި އެވެ
އެމްސީއެސްސީގެ އިންޑޯ ކޯޓުގައި މިއަދު މެންދުރުފަހު ކުޅުނު ފައިނަލް މެޗުގެ ސެޓްތައް ގޮއިދޫ ސްކޫލުން ގެންދިޔައީ 25-15، 25-11 އަދި 25-18 އިންނެވެ.
މި މުބާރާތުގައި ވާދަކުރި ގޮއިދޫ ސްކޫލުގެ 16 އަހަރުން ދަށުގެ އަންހެން ޓީމުވެސް ވަނީ ޗެމްޕިއަންކަން ހޯދައި ތަށި މިލްކުވެސް ކޮށްފަ އެވެ. އެ ޓީމުން ތަށި ގެންދިޔައީ ފައިނަލުގައި ރޭ އަހްމަދިއްޔާ ސްކޫލު 3-1 ސެޓުން ބަލިކޮށްގެންނެވެ. އެ ޓީމު ވަނީ މިދިޔަ މަހު އޮތް އިންޓަ ސްކޫލް ބީޗް ވޮލީބޯޅަ މުބާރާތްވެސް ޖެހިޖެހިގެން ތިން އަހަރު ކާމިޔާބުކޮށް ތަށި މިލްކުކޮށްފަ އެވެ.
ގޮއިދޫ ސްކޫލުން ބުނީ، ކުޅިވަރުތަކުން ހޯދާ ކާމިޔާބީތަކުގެ ފަހަތުގައި އެރަށުގެ ރައްޔިތުންގެ އެކުވެރިކަމާ، އެއްބައިވަންތަކަށް މުހިއްމު ދައުރެއް އަދާކުރާ ކަމަށެވެ.
ގޮއިދޫން ވަނީ ދެ ޖިންސުގެ އެތްލީޓުންނާއި ވޮލީބޯޅަ އާއި ފުޓްބޯޅައިގައި ކުރިއަރަމުން ރަންވަނަ ހޯދަމުންދާ ކުޅުންތެރިން އުފައްދާފަ އެވެ. އަދި ކުރިމަގުގައި ސްކޭޓް ކުރުމަކީ އެ ރަށުގައި ވިދާލާނެ ހުނަރެއްކަމުގައި ބެލެވޭ ވެއެވެ. މީގެ އިތުރުން މޫދުގައި ކައިޓްސާފިން އަކީ ވެސް އެރަށުގައި މިހާރު ވަރަށް ފޯރިއާއެކު ކުރަމުން އަންނަ ކަމަކެވެ. އެގޮތުން ކައިޓްސާފިންގައި ރާއްޖޭން ބޭރުގައި ވާދަކުރެވިދާނެ ވަރުގަދަ ހުނަރުވެރިންވެސް އެރަށުން ވިދާލުން އެކަށީގެންވެ އެވެ.
