ސޮނެވާފުށި ރިސޯޓާއި މާޅޮހު ސްކޫލް ގުޅިގެން އެސްކޫލުގެ ގްރޭޑް ތިނެއްގެ ދަރިވަރުންނަށް ހިންގާ ފަތަން ދަސްކޮށްދިނުމުގެ ޕްރޮގްރާމް ފަށައިފިއެވެ.
މާޅޮހު ސްކޫލުގެ ގްރޭޑް 03 އެއްގެ ހުރިހާ ދަރިވަރުން ބައިވެރިވާ މި ޕްރޮގްރާމުގައި ކިޔަވައިދެއްވަނީ މާޅޮހުގެ ސްވިމިންގ އިންސްޓްރަކްޓަރުންނެވެ.
ސޮވެވާފުށީ ރިސޯޓުން ބުނިގޮތުގައި މި ޕްރޮގްރާމުގެ މަޤްސަދުތަކުގެ ތެރޭގައި ދަރިވަރުންނަށް ފަތަން ދަސްކޮށްދިނުމުގެ އިތުރުން، ކަނޑާއި މޫދު އަދި ވަށައިގެންވާ ތިމާވެށީގެ މައުލޫމާތު ދަރިވަރުންނާއި ހިއްސާކޮށް ހޭލުންތެރިކުރުވުމާއި ކަނޑާއި މޫދުގެ ހަރަކާތްތަކަށް ދަރިވަރުންގެ ޝައުޤުވެރިކަން އިތުރުކުރުން ހިމެނެ އެވެ.
ސޮނެވާފުށި ރިސޯޓުން ބ. އަތޮޅުގެ ރަށްތަކުގައި ފަތަން ދަސްކޮށްދިނުމުގެ ޕްރާގްރާމްތައް 2014 ވަނަ އަހަރު ފެށިފަހުން މިހާތަނަށް ވަނީ 223 މީހަކަށް ފަތަން ދަސްކޮށްދީ 28 ސްވިމިންގ އިންސްޓްރަކްޓަރުން ތަމްރީނުކޮށްފަ އެވެ. މިއަހަރު މާޅޮހުގެ އިތުރުން، އިތުރު ފަސް ރަށެއްގައި މިޕްރޮގްރާމް ކުރިއަށް ގެންދިއުމަށް ރޭވިފައިވާ ކަމަށް ސޮނެވާފުށީ ރިސޯޓުން ބުންޏެވެ.