އެމެރިކާގެ މަޝްހޫރު ޓޫރިޒަމް މަޖައްލާ “ކޮންޑެ ނާސްޓް ޓްރެވެލާ” އިން ހޮވި ދުނިޔޭގެ އެންމެ ހިތްގައިމު 75 ހޮޓެލް ތެރޭގައި ރާއްޖޭގެ ދެ ރިސޯޓެއް ހިމެނިއްޖެއެވެ.
އެއީ ދުނިޔޭގެ މަޝްހޫރު ހޮޓެލް ޗެއިނެއް ކަމަށްވާ ފޯ ސީޒަންސް އިން ތަރައްގީ ކުރި ފުރަތަމަ ޕްރައިވެޓް އައިލެންޑް ރިސޯޓް ކަމަށްވާ ވޯވަށް ޕްރައިވެޓް އައިލެންޑާ ދ. އަތޮޅުގައި ސެއިންޓް ރެޖިސް އިން ހިންގާ ވޮއްމުލި ރިސޯޓެވެ.
ފޯ ސީޒަންސް އިން ބ. އަތޮޅުގައި ހިންގާ ލަނޑާގިރާވަރު ރިސޯޓުން ގާތްގަނޑަކަށް 20 މިނިޓުން ދެވޭ ވޯވަށް ހުޅުވާފައިވަނީ، މިދިޔަ އަހަރު ފަހުކޮޅު އެވެ.
ޔުނެސްކޯގެ ބަޔޮސްފިއާ ރިޒާވް ސަރަހައްދުގައި އޮންނަ ވޯވަށުގައި ހުންނަނީ އެންމެ ހަތް ކޮޓަރި އެވެ. މީގެ އިތުރުން، ގިނަވެގެން ފަހަރަކު 22 ޓޫރިސްޓުންނަށް ތިބެވޭ ގޮތަށް ތަރައްގީ ކޮށްފައިވާ މި ރަށުގައި ދެ ބުރީގެ ބީޗް ހައުސްއެއް ހުރެ އެވެ. އެ ތަނުގައި ކާ ތަނަކާއި ނިދާ ކޮޓަރިއަކާއި ސްވިމިން ޕޫލަކާއި ލައިބްރަރީއެއް އަދި ޖިމެއް ހުރެ އެވެ.
މި ރަށުގައި ސްޕާއަކާއި ޔޯގާ އަދި މެޑިޓޭޝަން ފަދަ ކަންކަން ކުރެވޭނެ ތަނެއް ވެސް ވަނީ ތަރައްގީ ކޮށްފަ އެވެ. އަދި އިސްތަށިގަނޑުގައި ބޭނުންކުރާ ތަކެތި އުފައްދާ އިޓަލީގެ މަޝްހޫރު ކުންފުންޏެއް ކަމަށްވާ ރޮސާނޯ ފެރޭޓީގެ ތަޖުރިބާކާރަކު ވެސް ގެސްޓުންގެ ހިދުމަތުގައި ހަރަކާތްތެރިވެ އެވެ.
ގާތްގަނޑަކަށް ފަސް ހެކްޓަރުގެ ވޯވަށް ތަރައްގީކޮށްފައިވަނީ ސަލާމަތީ ގޮތުން ވެސް ގިނަ ފިޔަވަޅުތަކެއް ހިމަނައިގެންނެވެ. އެ ގޮތުން، އެންމެ ކޮޅަކުން އެ ރަށަށް ދެވޭ ގޮތަށް ހަދާފައިވާ އިރު، ރަށުގެ އެކި ހިސާބުތަކުގައި ސީސީޓީވީ ކެމެރާގެ އިތުރުން ނައިޓް ވިޝަން ކެމެރާ ވެސް ވަނީ ހަރުކޮށްފަ އެވެ. އަދި 24 ގަޑިއިރު ސެކިއުރިޓީން ރަށު ތެރޭގައި ހަރަކާތްތެރިވާނެ އެވެ.
“ކޮންޑެ ނާސްޓް ޓްރެވެލާ” އިން ހޮވި ދުނިޔޭގެ އެންމެ ހިތްގައިމު 75 ހޮޓެލް ތެރޭގައި ރާއްޖޭގެ ބ. އަތޮޅު ވޯވަށް ހިމެނުނުއިރު، އެ މަޖައްލާގެ ޗައިނާގެ އަދަދުން މިދިޔަ ހަފުތާގައި ހޮވި ރާއްޖޭގެ އެންމެ ކަމުދާ ހޮޓެލްގެ އެވޯޑު ލިބުނީ މިއަތޮޅުިގައި ހިންގާ ސޮނެވާފުށި ރިސޯޓަށެވެ.