ބ.އަތޮޅުގައި ބާއްވަމުން އަންނަ އެންމެ އަގުބޮޑު ފުޓްސަލް މުބާރާތް ކަމަށްވާ ބ.އެޓޯލް ޔުނިޓީ ފުޓްސަލް ޗެލެންޖްގެ މިއަހަރުގެ ޗެންޕިއަން ޓީމާށައި ރަނަރަޕް ޓީމަށް ފައިސާ ހަވާލުކޮށްފިއެވެ. މި މުބާރާތް މި އަހަރު ކުރިޔަށް ގެންގޮސްފައިވަނީ މާރޗް މަހު 1 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ.
މިދިޔަ ހުކުރު ދުވަހުގެރޭ ސަލްސާ ރިޓްރީޓްގައި ބޭއްވި ކުޑަ ރަސްމީޔާތެެއްގައި 2 ޓީމަށް ވެސް ފައިސާ ހަވާލުކޮށްދެއްވީ ކްލަބް ދަ ބިގިނާރސްގެ ރައީސް އަލީ ޝާފީގްއެވެ.
ޗެންޕިއަން ޓީމަށް 12000 ރުފިޔާ ދިން އިރު ރަނަރަޕް ޓީމަށް ވަނީ 5000 ރުފިޔާ ދީފައެވެ. މި އަހަރު މި މުބާރާތުގެ ޗެންޕިއަންކަން ފެއިމްސް ޔުނައިޓެޑް ހޯދީ މުޅިން އަލަށް ފައިނަލުގައި ވާދަކުރި އިރުމަތި ލަވާރސް 0-6 ގެ ތަފާތު ބޮޑު ނަތީޖާއަކުން ބަލިކޮށްގެންނެވެ.
މިއީ ފެއިމްސް ޔުނައިޓެޑުން މި މުބާރާތް ކާމިޔާބުކުރި 2 ވަނަ ފަހަރެވެ. މި މުބާރާތް ބޭއްވި ފުރަތަމަ އަހަރު ޗެންޕިއަންކަން ހޯދާފައިވަނީ ފެއިމްސް ޔުނައިޓެޑެވެ. ޖެހިގެން އައި 2 އަހަރު މި މުބާރާތް ކާމިޔާބުކުރީ ސޮނެވާފުއްޓެވެ. މިއީ ކްލަބް ދަ ބިގިނާރސް އިން މި މުބާރާތް ބޭއްވި 4 ވަނަ އަަަހަރެވެ.
