ފިތުރު އީދުގެ މުނާސަބަތުގައި ބ. މަޅޮހު ޒުވާނުން އިސްނަގައިގެން އެރަށުގައި އުމުރުން ދުވަސްވީ މީހުންނަށް ހާއްސަ ކޮށްގެން ފޯރިގަދަ ދެ ވޮލީ މެޗު ކުޅެފި އެވެ.
އިއްޔެ ހަވީރު ކުޅުނު ފުރަތަމަ މެޗުގައި ބައްދަލުކުރީ 30-40 އަހަރާ ދެމެދުގެ ޓީމަކާއި 30 އަހަރުން ދަށުގެ ޓީމެކެވެ. 3-2 ސެޓުން އެ މެޗު ކާމިޔާބުކުރީ 30-40 އަހަރާ ދެމެދުގެ މީހުންގެ ޓީމެވެ.
ދެވަނަ މެޗުގައި ރޭ ކުޅުނީ އުމުރުން ދުވަސްވީ މީހުންގެ ދެ ޓީމެވެ. އޭގެ ތެރޭގައި މުޅިންހެން ހިމެނެނީ އުމުރުން 50 އަހަރުން މަތީގެ މީހުންނެވެ. އެގޮތުން ބައްދަލުކުރި ދެ ޓީމަކީ ހިތްވަރު އަދި ބުންވަރު ޓީމެވެ. މި މެޗު 3-1 ން ކާމިޔާބުުރީ ހިތްވަރު ޓީމެވެ.
ވޮލީ މެޗުތައް އިންތިޒާމުކުރުމުގައި އިސްކޮށް އުޅުނު މާޅޮހު ޒުވާނަކު ބުނިގޮތުގައި މި މެޗުތަކަކީ އީދުގެ މުނާސަބަތުގައި އުމުރުން ދުވަސްވީ މީހުން އެއްތަނަކަށް އެއްވެ، ހަރަކާތްތެރިވެ އެމީހުން ކުޅިވަރަށް ހުންނަ ޝައުގުވެރިކަން އިތުރުކުރުމުގެ ގޮތުން ކުޅުނު މެޗުތަކެކެވެ.