ގައުމީ ފެންވަރުގައި ބޭއްވި ޔޫސީމަސް މުބާރާތެއްގައި ވާދަކޮށް ޔުސީމަސް އޭދަފުށީ ސެންޓަރުގެ ދަރިވަރުންތަކެއް ކާމިޔާބީތަކެއް ހޯދައިފި އެވެ.
އެ ސެމްޓަރުގެ 13 ދަރިވަރަކު ވަނީ މިމަހު މާލޭގައި އޮތް “ޔުސިމަސް ނެޝަނަލް ކޮމްޕެޓިޝަން” ގައި ބައިވެރިވެފަ އެވެ. މި މުބާރާތުން އެ ސެންޓަރުގެ ފާތުމަތު ސަދީ ވަނީ އެލިމެންޓްރީ އޭ ލެވެލް އިން އެއްވަނަ އަދި މުޅި މުބާރާތުން ތިންވަނަ ހޯދައިފަ އެވެ. މި މުބާރާތުގައި މާލޭ ޔޫސީމަސް ސެންޓަރުންނާއި އަތޮޅު ތެރޭގެ ޔޫސީމަސް
ސެންޓަރުތަކުން ވެސް ދަރިވަރުން ވާދަކުރި އެވެ.
މީގެ އިތުރުން އޭދަފުށީ ޔޫސީމަސް ސެންޓަރުގެ 9 ދަރިވަރުން ވަނީ މި މުބާރާތުން ޑިސްޓިންގްޝަން އެވޯޑް ވެސް ހޯދައިފަ އެވެ.
އޭދަފުށީ ޔޫސީމަސް ސެންޓަރުގެ ފައުންޑާ އައިޝަތު ރިޝްމީ ވިދާޅުވި ގޮތުގައި މިއީ ގައުމީ ފެންވަރުގައި ބޭއްވި ޔޫސީމަސް މުބާރާތެއްގައި ފުރަތަމަ ފަހަރަށް ބައިވެރިވެ އެ ސެންޓަރުގެ ދަރިވަރުން ހޯދި ވަރަށް ބޮޑު ކާމިޔާބީއެއް ކަމަށެވެ.
ރިޝްމީ ވިދާޅުވި ގޮތުގައި މިފަދަ މުބާރާތްތަކުގައި ބައިވެރިވުމުގެ އެންމެ ބޮޑު އެއް ބޭނުމަކީ ދަރިވަރުންނަށް ގައުމީ އަދި ބައިނަލް އަގްވާމީ ފެންވަރުގެ އެކި މުބާރާތްތަކުގައި ވާދަ ކުރުމުގެ ފުރުސަތު ހޯދައިދިނުމެވެ.
އޭދަފުށީގައި ޔޫސީމަސް ސެންޓަރެއް ހުޅުވީ މިއަހަރުގެ ކުރީކޮޅު އެވެ. 2018 ވަނަ އަހަރުގެ ކްލާސްތަކަށް ވަނުމުގެ ފުރުސަތު 6 އަހަރާއި 14 އަހަރާ ދެމެދުގެ ދަރިވަރުންނަށް ޑިސެމްބަރު 31ގެ ނިޔަލަށް އެ ސެންޓަރުން މިހާރު ވަނީ ހުޅުވާލައިފަ އެވެ.