އިއްޔެ ބޭއްވި ރިޔާސީ އިންތިހާބުގައި ޕީޕީއެމްގެ ކެންޑިޑޭޓް ރައީސް އަބްދުލްﷲ ޔާމީންއާ ވާދަކުރައްވައި އިދިކޮޅު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ހޯއްދެވި ކާމިޔާބީގެ އުފާ ފާޅުކުރުގެ ގޮތުން މިއަދު ހަވީރު އޭދަފުށީގައި ވެހިކަލު ބުރެއް ބާއްވައިފި އެވެ.
ޕިކަޕްގައި އަޑުގަދަ ކުރާ ބޭނުންކޮށްގެން އިދިކޮޅު އިއްތިހާދުގެ ކެމްޕޭން ލަވަތައް ޖަހަމުން މިރަށުގެ ބޮޑެތި މަގުތަކުގައި ބޭއްވި މި ހިނގާލުމުގައި އެމްޑީޕީއާއި ޖުމްހުރީ ޕާޓީއަށް ތާއީދުކުރާ ގިނަ އަދަދެއްގެ އަންހެނުންނާއި ފިރިހެނުން އަދި ކުޑަކުދިންވެސް ބައިވެރިވި އެވެ. އުފާ ފާޅުކުރުމުގެ ގޮތުން ވެހިކަލު ބުރަށްފަހު ލަވަޖަހައި ނަށާ ހަދާފައިވެ އެވެ.
ރިޔާސީ އިންތިހާބުގައި އިދކޮޅު ކޯލިޝަނަށް ވަރަށް ފުރިހަމަ ކާމިޔާބީއެއް ލިބުމާ ގުޅިގެން މުޅި ރާއްޖޭގެ އެކި ކަންކޮޅުތަކުގައި އަންނަނީ އުފާފާޅުކުރަމުންނެވެ.
އިލެކްޝަންސް ކޮމިޝަން (އީސީ) އިން އާއްމުކޮށްފައިވާ ރަސްމީ ވަގުތީ ނަތީޖާ އިން ދައްކާ ގޮތުގައި އިބޫ އިންތިޚާބު ކާމިޔާބުކުރެއްވީ، 134،616 ވޯޓުންނެވެ. އެއީ 58.4 ޕަސެންޓެވެ. ރައީސް ޔާމީނަށް ލިބިވަޑައިގަތީ، 96،123 ވޯޓެވެ. އެއީ 41.6 ޕަސެންޓެވެ.
ވޯޓުލުމުގެ ހައްގު ލިބިފައިވާ 262,135 މީހުންގެ ތެރެއިން 89 ޕަސެންޓު މީހުން މި އިންތިޚާބުގައި ވޯޓުލާފައިވެ އެވެ.