1 – ރޯދައަކީ ފާފަފުއްސެވޭ އަޅުކަމެއްކަން ޤަބޫލުކޮށްގެންހުރެ ރޯދަހިފާށެވެ.
2 – ޢުޒުރަކާ ނުލައި ރޯދަދޫކޮށްލުމަކީ ބޮޑެތި ފާފައިގެ ތެރެއިން ފާފައެއް ކަމުގައިވާތީވެ އެކަންނުކުރުމަށް ޢަޒުމު ކަނޑައަޅާށެވެ.
3 – ތިބާގެ ދުޢާ އާއި ޢަމަލުތައް ޤަބޫލުވެވުމަށް ޓަކައި ތިބާ ކައިބޮއި ހަދާ ތަކެއްޗާއި އަންނައުނަކީ ހަލާލުގޮތުގައި ހޯދާތަކެތި ކަމުގައި ވާންވާނެ އެވެ.
4 – ރޯދަވެރިއަކަށް އިފްތާރު (ރޯދަވީއްލުން) ދޭށެވެ. އޭނާގެ ރޯދައިގެ ޘަވާބު ތިބާ އަށް ވެސް ލިބޭނެ އެވެ.
5 – ތިބާގެ ގޭގައި ނަމަވެސް ތަރާވީހް ނަމާދު ކުރެވޭތޯ ބަލަންވާނެ އެވެ.
6 – ރޯދަމަހުކުރެވޭ ޞަދަޤާތުގެ ދަރުމަ އިތުރުވެގެންވާ ކަމަށްޓަކައި އެމަހުގެ ތެރޭގައި އެކަން ގިނަކުރެވޭތޯ ބަލާށެވެ.
7- ފައިދާހުރި ގޮތުގައި ވަގުތުގެ ބޭނުން ހިފާށެވެ.
8- ރޯދަމަހު ކުރާ ޢުމްރާއެއްގެ ޘަވާބު ޙައްޖެއްގެ ޘަވާބާ އެއްވަރުވާކަމަށް ޓަކައި ކުޅަދާނަކަން ލިބިގެންވާ މީހުން އެ މަހުގެ ތެރޭގައި އެކަންކުރެވޭތޯ ބަލާށެވެ.
9- ފަޖުރުގެ އަލިކަން ފައުޅުވުމާ ކައިރި ވަގުތެއްގައި ހާރުކެއުން މޮޅުއިތުރުވެގެންވާ ކަމަށް ޤަބޫލުކުރާށެވެ.
01- އިރުއޮއްސިއްޖެކަން ޔަޤީންވުމުން ރޯދަވީއްލުމަށް އަވަސްވެގަންނާށެވެ. ހަމަކަށަވަރުން އެކަމަށް ﷲގެ ރުހިވޮޑިގަތުން ތިބާއަށްވެއެވެ.
11- ޖުނުބުވެރިވެފައިވާ ނަމަ ފަތިސްވުމުގެކުރިން ހިނައި ތާހިރު ނުވެވިއްޖެ ނަމަ އަޅުކަން ކުރުމުން އެއްކިބާ ވެވޭކަމަށް ޓަކައި އެކަންކުރުމަށް އަވަސްވެގަންނަންވާނެ އެވެ.
12- ޤުރުއާނުގެ ތިލާވަތުކުރުން ގިނަކުރާށެވެ.
13- ރޯދައިގެ ޘަވާބު އުނިވެދާނޭ ކަމަށްޓަކައި ދޮގުހެދުމާއި ޣީބަބުނުމާއި ދެބައުޑުވުމުން ދުރުހެލިވާށެވެ.
14- ރުޅިގަދަވިޔަ ނުދީ ނަފްސު ހިފެހެއްޓޭތޯ ބަލަންވާނެ އެވެ. އެހެންނޫން ނަމަ އެއީ ނުކައިނުބޮއި ހުންނަންޖެހޭތީވެ ވާކަމެއް ކަމަށް ތިބާގެ މައްޗަށް ތުހުމަތުކުރެވި ފަޟީހަތް ވެދާނެ އެވެ.
15- ރަމަޟާންމަހުގެ ރޯދަ ހިފުމުގެ ސަބަބުން އިތުރުވެފައިވާ ތަޤްވާވެރިކަން ދެމެހެއްޓުމަށްޓަކައި ސުންނަތް ރޯދަ ހިފުމަށް ޢަޒުމް ކަނޑައަޅައިގެން އެކަންކުރަން ވާނެ އެވެ.
16- ތިބާ އާއި ތިބާގެ މައިންބަފައިން އަދި ދަރީންގެ މައްޗަށް ތިބާކުރާ ދުޢާ އިތުރުކުރާށެވެ.
17- ކީރިތިރަސޫލާގެ މައްޗަށް ޞަލަވާތާއި ސަލާމް ލެއްވުން އެދި ކުރާ ދުޢާ ގިނަކުރާށެވެ. ހަމަ އެފަދައިން އެކަލޭގެފާނުގެ އާލުވެރި ބޭކަލުންނާއި އަޞްޙާބު ބޭކަލުންނާއި ތާބިޢީ ބޭކަލުންގެ މައްޗަށް ވެސް އެކަންކުރުން ގިނަކުރާށެވެ.
18- ރޯދަމަހު ރޯދައިގެ ޘަވާބު އެންމެ ފުރިހަމަ ވާނީ ޝައްވާލު މަހުގެ ހަ ރޯދަ ވެސް ހިފައިގެންނެވެ. އެގޮތް ބޭނުންވާ އަޚުންނާއި އުޚުތުން އެކަންކުރަންވާނެ އެވެ.
19- ހަ ރޯދައަކީ ހަމަ އެކަމަށް ނިޔަތް ގަނެގެން ހިފާ ރޯދަތަކެއް ކަމުގައި ހަދަންވާނެ އެވެ. ރޯދަމަހުގެ ރޯދަތަކުން ވީއްލުނު ރޯދަތައް ފުރިހަމަކުރާ ރޯދަތަކަށް ހަދައިގެން ނުވާނެ އެެވެ.