“ގައުމައިގެން ކުރިއަށް” ކޯލިޝަންގެ ރިޔާސީ ކެންޑިޑޭޓް ރައީސް ޑރ. މުހަންމަދު ވަހީދު ހަސަން މިއަދު އޭދަފުއްޓަށް ވަޑައިގަތުމަށް ހަމަޖެހިފައިވާ ކަމަށް އެ ކޯލިޝަނުން ބުނެފި އެވެ.
އެ ކޯލިޝަންގައި ހިމެނިވަޑައިގަންނަވާ ޑިއާރުޕީގެ މީޑިއާ ކޯޑިނޭޓަރު އަލީ ސޯލިހު މިއަދު އީޓީ އަށް ވިދާޅުވީ ކެމްޕެއިން ދަތުރުފުޅެއްގައި ކޯލިޝަންގެ ރިޔާސީ ކެންޑިޑޭޓް ޑރ ވަހީދު މިއަދު ހަވީރުގެ ވަގުތެއްގައި އޭދަފުއްޓަށް ވަޑައިގަތުމަށް ހަމަޖެހިފައިވާ ކަމަށެވެ.
ސޯލިހު ވިދާޅުވީ ޑރ ކޯލިޝަންގެ މި ދަތުރުގައި ވަހީދުގެ އަރިހުގައި ރަނިންމޭޓް އަހްމަދު ތަސްމީން އަލީ އާއި ކޯލިޝަންގެ އިސްބޭފުޅުންގެ ޓީމެއް ބައިވެރިވަޑައިގަންނަވާނެ ކަމަށެވެ.
މި ދަތުރުފުޅުގައި ރައީސް ވަހީދު އޭދަފުއްޓަށް ވަޑައިގެން މިރޭ ރައްޔިތުންނާ ބައްދަލުކުރެއްވުމުގެ އިތުރުން އޭދަފުށީގައި ހަރަކާތްތެރިވާ ކެމްޕޭން ޓީމުގެ އިސްބޭފުޅުންނާ ބައްދަލުކޮށް ކެމްޕޭން ހަރަކާތްތައް ކުރިއަށްދާގޮތާބެހޭގޮތުން މަޝްވަރާ ކުރައްވާނެ ކަމަށްވެސް އަލީ ސޯލިހު ވިދާޅުވި އެވެ.
ރައީސް ވަހީދު ބައިވެރިވަޑައިގަންނަވާ “ގައުމައިގެން ކުރިއަށް” ކޯލިޝަނުން ބާއްވާ ޖަލްސާ އޮންނާނީ މިރޭ ބ. އަތޮޅު ތައުލީމީ މަރުކަޒުގެ ހޯލުގަ އެވެ.
