މިހާރު ކުރިއަށްދާ އެލްމޯބައިލް ޔޫތް ޗެމްޕިއަންޝިޕްގެ ކުއާޓާ ފައިނަލްގައި ފުޓްބޯޅައިގެ ނަން މަޝްހޫރު ދެރަށް ކަމަށްވާ އޭދަފުށްޓާއި މަހިބަދޫ ވާދަކުރަން ޖެހިއްޖެއެވެ.
މުބާރާތުގެ ގްރޫޕް ސްޓޭޖްގެ ކުޅުން ނިމުނުއިރު އޭދަފުށީ ޒުވާނުންގެ ކުލަބުން ވަނީ އެޓީމު ހިމެނުނު ގްރޫޕް ތިނެއްގެ އެއްވަނަ މަޤާމް ހޯދާފައެވެ. އަދި މަހިބަދޫ ކުއާޓާ ފައިނަލް ޔަގީންކުރީ ގްރޫޕް ސްޓޭޖްގައި އީގަލްސްގެ ފަހަތުން އެ ގްރޫޕްގެ ދެވަނަ ހޯދައިގެންނެވެ.
ކުއާޓާ ފައިނަލްގެ މެޗްތައް ކުޅުން ފެށޭނީ އަންނަ އާދީއްތަ ދުވަހުއެވެ. ފުރަތަމަ މެޗްގައި އާދިއްތަ ދުވަހު ހަވީރު އީގަލްސް ނިކުންނާނީ އޭވައިއެލް އާއި ދެކޮޅަށެވެ. ތިންވަނަ މެޗްގައި ހޯމަ ދުވަހު ހަވީރު ނިއުރޭޑިއަންޓާއި ކެލާނާޅި ބައްދަލުކުރާއިރު ފަހު މެޗްގައި އަންގާރު ދުވަހުގެ ރޭ މާޒިޔާ ނިކުންނާނީ ވައިކަރަދޫ އާއި ދެކޮޅަށެވެ. ކުއާޓާ ފައިނަލްގައި އޭދަފުށްޓާއި މަހިބަދޫ ބައްދަލުކުރާމެޗް އޮންނާނީ 10 ފެބްރުއަރީ ވާ ހޯމަ ދުވަހުގެ ރޭ 9 ޖަހާއިރު އެއް ނަންބަރ ޓާފް ދަނޑުގައެވެ.
މުބާރާތުގެ ސެމީ ފައިނަލް މެޗްތައް ކުޅެވޭނީ މިމަހުގެ 16 އަދި 17 ވަނަ ދުވަހުއެވެ. ފައިނަލް މެޗް ކުޅުމަށް ހަމަޖައްސާފައި ވަނީ މިމަހުގެ 20 ވަނަ ދުވަހުއެވެ.
