ނެޝަނަލް ހާޑުވެއާއިން އިންތިޒާމް ކޮށްގެން މާލޭގައި މިހާރު ކުރިއަށްދާ ފުޓުސަލް މުބާރާތުގެ ގަދަ 16 ޓީމުގެ ބުރަށް ބ. ހިތާދޫ ޓީމު ދަތުރުކޮށްފި އެވެ.
ހިތާދޫ ޓީމު ޖާގަ ހޯދީ މި މުބާރާތުގެ ދެވަނަބުރުގެ ދެވަނަ މެޗުގައި ރޭ ގދ. ތިނަދޫ އަތުން 5-1 އިން މޮޅުވެގެންނެވެ.
މި މެޗުގައި ހިތާދޫ ޓީމަށް ކާމިޔާބު ކޮށްދިން ފަސްލަނޑުގެ ތެރެއިން ތިންލަނޑު ޖަހާފައިވަނީ ހުޒައިފަތު ރަޝީދު (ހުޒޭ) އެވެ. އަނެއް ދެލަނޑު ޖަހައިދިނީ އަންމަޑޭ އާއި އަލީ ހައިޝަމެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ހިތާދޫ ޓީމުގެ ހުޒައިފަތު ރަޝީދު އެވެ.
ރޭ ކުޅުނު މި މެޗަކީ ހިތާދޫ ޓީމު ކުޅުނު ފުރަތަމަ މެޗެވެ. މި މުބާރާތުގައި ބ. އަތޮޅުން ބައިވެރިވެފައިވާ ހަމަ އެކަނި ޓީމަކީ ހިތާދޫ ޓީމު ކަމަށްވުމުން ހިތާދޫ ޓީމުވަނީ އޮޓަމެޓިކުން ދެވަނަ ބުރަށް ކޮލިފައިން ވެފައެވެ.
