ނޯޓް: މިއީ “ހަވީރު” ނޫހުގައި 29 ނޮވެމްބަރު 2015 ގައި އިބްރާހިމް ނޫރު ލިޔެފައިވާ ރިޕޯޓެކެވެ.
ބ. އަތޮޅު ކުންފުނަދޫގައި ހިންގާ ސޮނެވާފުށި ރިސޯޓަށް 20 އަހަރު ފުރުން ބުދަ ދުވަހު ފާހަގަ ކުރީ ދުނިޔޭގެ މަޝްހޫރު ބައެއް ނޫސްވެރިންނާއި ފިލްމީ ތަރިންނާއި މޮޑެލުންނާއި ޑިޒައިނަރުންނާ ވެސް އެކު އެވެ.
އެ ގޮތުން ބުދަ ދުވަހު ހަވީރު އެ ރިސޯޓްގެ ބީޗްގައި އޮތް އިވެންޓެއްގައި ބ. އަތޮޅުގެ ކިޔަވާކުދިން ދިވެހި ސަގާފީ ހެދުމުގައި އައިޓަމެއް ހުށަހަޅައިދީފައިވެ އެވެ.
މި މުނާސަބަތަށް 19 ވަނަ ގަރުނުއްސުރެ އެމެރިކާގައި ޝާއިއު ކުރަމުން އަންނަ މަޝްހޫރު އަންހެނުންގެ ފެޝަން އާބެހޭ މަޖައްލާ “ހާޕާސް ބާޒާރު” މަޖައްލާގެ އެޑިޓަރު ޖަސްޓީން ޕިކާޑީ ވެސް ވަނީ ވަޑައިގެންފަ އެވެ. އަދި ދިވެހި ކުދިންނާއެކު އޭނާ ނެންގެވި ފޮޓޯގެ އިތުރުން ސޮނެވާފުށިން ދިން މި ހަފުލާގެ 23 ފޮޓޯއެއް ވަނީ އެ މަޖައްލާގައި “ފޮޓޯ ފީޗާ”އެއް ގޮތަށް ބުދަ ދުވަހު ޝާއިއު ކޮށްފައެވެ.
މި މުނާސަބަތަށް ވަނީ އިނގިރޭސި ވިލާތުގެ މޮޑެލް ޖޯޑީ ކިޑް ވެސް އައިސްފަ އެވެ. މިހާރު އުމުރުން 37 އަހަރު ވެފައިވާ ޖޯޑީ ވަނީ އުމުރުން 15 އަހަރުގައި ކެރިއަރު ފަށައިފަ އެވެ. އަދި މިހާރު އޭނާއަކީ ރޭސް ކާރު ދުއްވުމުގައި މަޝްހޫރު ޑްރައިވަރެކެވެ. މީގެ އިތުރުން ޓީވީގެ ވެސް މަގުބޫލު ތަރިއެކެވެ. އެ ގޮތުން މި އަހަރު ޗެނަލް 5 ގެ ކްލެސިކް ކާރުތަކާ ބެހޭ ޝޯ ވެސް ހުށަހަޅައިދިނީ އޭނާ އެވެ. އަދި މިދިޔަ އަހަރު “މާސްޓަ ޝެފް” ކައްކާ ޕްރޮގްރާމްގައި ވެސް ބައިވެރިވި އެވެ.
މި ޝައުގުން ފުރިފައިވާ ހަފުލާއަށް ފަރަންސޭސި ގަހަނާ ޑިޒައިނަރު ޕަލޯމާ ޕިކާސޯ އާއި އޭނާގެ ފިރިމީހާ އެރިކް ތެނެވޭ ވެސް ވަނީ އައިސްފަ އެވެ.
މީގެ އިތުރުން މި ހަފުލާގައި ބައިވެރިވި ސެލެބްރިޓީން ތެރޭގައި އެމެރިކާގެ މަޝްހޫރު އަންހެން މިއުޒިކް ބޭންޑް ޕުސީކެޓް ޑޯލްސްގެ ކުރީގެ ލަވަކިޔުންތެރިޔާ ނިކޯލް ޝާޒިންގާ އާއި ހަނދުގައި ދެވަނަ އަށް ފައި ޖެއްސި ކަމަށް ރިޕޯޓް ކުރެވިފައިވާ އެމެރިކާގެ އިންޖިނޭރު އަދި އެސްޓްރޮނޯޓް ބަޒް އޯލްޑްރިން އާއި އިނގިރޭސި ވިލާތުގެ ބީބީސީ، އައިޓީވީ އަދި ޗެނަލް 5 ގެ ޕްރެޒެންޓަރު އަދި ލިޔުންތެރިޔާ ބެން ފޮގްލް ހިމެނެ އެވެ. ފޮގްލް އައިސްފައި ވަނީ އޭނާގެ އަންހެނުން މަރީނާއާއެކުގަ އެވެ.
މީގެ އިތުރުން އިނގިރޭސި ވިލާތުގެ މަޝްހޫރު ބަތަލާ ނައޯމީ ހެރިސް ވެސް ހަފުލާގައި ބައިވެރިވި އެވެ.
“ޕައިރެޓްސް އޮފް ދަ ކެރީބިއަން”ގެ ދެ ފިލްމަކާއި، ޖޭމްސް ބޮންޑްގެ ދެ ފިލްމް ކަމަށްވާ މިހާރު މާލޭގެ ޝްވެކް ސިނަމާގައި ދައްކަމުން އަންނަ “ސްޕެކްޓާ” އާއި 2012 ގެ “ސްކައިފޯލް” އާއި ދެކުނު އެފްރިކާގެ މިނިވަންކަމުގެ ބާނީ ނެލްސަން މަންޑޭލާގެ ހަޔާތާ ބެހޭ ގޮތުން “އެވެންޖާސް”ގެ އިދްރީސް އަލްބާ 2013 ގައި އެކްޓް ކޮށްފައިވާ “މަންޑޭލާ: ލޯންގް ވޯކް ޓު ފްރީޑަމް”ގައި ވެސް ނައޯމީ ހަރަކާތްތެރިވެފައިވެ އެވެ.
ހާޕާސް ބާޒާރުގެ ފީޗާގައިވާ އެއް ފޮޓޯއަކުން ފެންނަނީ ބ. އޭދަފުއްޓަށް އުފަން އަދި މިހާރު ސޮނެވާފުށީގެ ސޫ ޝެފްގެ މަގާމުގައި ހުރި، ރައީސް ޔާމީން މި އަހަރު ގައުމީ އިނާމު ދެއްވި، ދުނިޔޭގެ އެތައް އެވޯޑެއް ލިބިފައިވާ ދިވެހި ޝެފް އަބްދުﷲ ސޮބާހުގެ ގާތުން ދިވެހި ކެއުމެއް ތައްޔާރު ކުރަން ނައޯމީ ދަސްކުރާ މަންޒަރެވެ.
ސޮބާއަކީ މި އަހަރު މާލޭގައި ބޭއްވި ހޮޓެލް އޭޝިއާ ފެއާގެ ކަލިނަރީ ޗެލެންޖުންއެތައް އެވޯޑުތަކެއް ހާސިލު ކުރި ޝެފެކެވެ. އެ ގޮތުން އޭނާއަށް ވަނީ އެ ފެއާގެ އެންމެ މޮޅު ޝެފާއި އެންމެ މޮޅު ދިވެހި ޝެފްގެ މަގާމުގެ އިތުރުން “ވާލްޑް ޝެފް އެސޯސިއޭސަން އޭޝިއާ ކޮންޓިނެންޓަލް ޑައިރެކްޓަރު މެޑަލް” (ދުނިޔޭގެ ޝެފުންގެ ޖަމިއްޔާގެ އޭޝިއާ ބައްރުގެ ޑައިރެކްޓަރުގެ މެޑެލް) ވެސް ލިބިފަ އެވެ.
ނައޯމީ ސޮނެވާފުއްޓަށް އައީ އޭނާގެ ދެބެއިން ކަމަށްވާ މެކްސް އާއި މަންމަ ކާމިން ވެސް ގޮވައިގެންނެވެ.
އޮސްކާ ހަތް އެވޯޑު ލިބުނު ހޮލީވުޑް ފިލްމް “ސްލަމްޑޯގް މިލިއަނަޔަ”އިން އޮސްކާ އެވޯޑު ގެންދިޔަ އިންޑިއާގެ މިއުޒިކް ކޮމްޕޯސަރު އޭ. އާރް. ރަހްމާން އެ ފިލްމަށް ތައްޔާރު ކުރި “ޖައެ ހޯ” ލަވައިގެ އިނގިރޭސި ވާޝަން ކިޔާފައިވާ ޝާޒިންގާ ވެސް ސޮނެވާފުއްޓަށް އައީ އޭނާގެ ދެބެއިން ކަމަށްވާ ކޭ އާއި ރަހްމަތްތެރިޔާ ކެޓީ ގޮވައިގެންނެވެ.
މީގެ އިތުރުން ބެން އާއި ޖޯޑީމެން ވޮލީ އާއި އެހެނިހެން ކުޅިވަރުތައް ކުޅޭ މަންޒަރާއި ސޮނެވާފުށި ރިސޯޓްގެ ފައުންޑަރުން ކަމަށްވާ އިނގިރޭސި ވިލާތުގެ ދެމަފިރިން ސޯނޫ އާއި އީވާ ޝިވްދަސާނީއާއެކު ނަގާފައިވާ ފޮޓޯތައް ވެސް ހިމަނާފައިވެ އެވެ.
މީގެ އިތުރުން ސޮނެވާފުށީގައި ތިބި ފަތުރުވެރި ކުޑަކުދިންނާއި ބ. އަތޮޅުގައި ތިބި ދިވެހި ކިޔަވާކުދިންނަށް އޯލްޑްރިންގެ އާ ފޮތުން އޭނާ ކިޔައިދޭ މަންޒަރު ވެސް ހުއްޓެވެ.
އަދި ބ. އަތޮޅުގެ ކުޑަކުދިން ގެނބުމުން ސަލާމަތްކޮށް ދިނުމުގެ ނިޔަތުގައިސޮނެވާފުށިން ފަށާފައިވާ “ލާން ޓު ސްވިމް” ޕްރޮގްރާމްގައި މި އަހަރު ބައިވެރިވާ ބ. އަތޮޅުގެ ކިޔަވާކުދިންނާއެކު ނައޯމީ ނަގާފައިވާ ފޮޓޯއެއް ވެސް ވެ އެވެ.
މި ޕްރޮގްރާމާ ގުޅޭ ގޮތުން “ނެޝަނަލް ޖޯގްރަފިކް” ޗެނަލްގެ އެޑްވެންޗަރާ ނުވަތަ ސައްޔާހު ޖޯން ބަވަމަސްޓާ މި އަހަރު ތައްޔާރު ކުރި ޑޮކިއުމެންޓްރީ ވެސް މިހާރު އަންނަނީ އެވޯޑުތަކަށް ހުށަހެޅެމުންނެވެ. މާލެ އާއި ބ. އޭދަފުއްޓާއި ސޮނެވާފުށި ފަދަ ރަށްރަށުގެ ޑްރޯނުން ނަގާފައިވާ އޭރިއަލް މަންޒަރުތަކާއި ކަނޑުއަޑީގެ އަންޑަވޯޓާ މަންޒަރުތަކުގެ ސަބަބުން ސޮނެވާފުށީގެ މި އިސްނެގުމަށް ދުނިޔޭގެ ސަމާލުކަން ވަނީ ހުއްޓިފަ އެވެ.
މި ހުރިހާ ސެލެބްރިޓީން ވެސް ވަނީ ސޮނެވާފުށީގެ އެ މީހުންގެ މި ހަނދާންތަކުގެ ފޮޓޯތަކާއި ވީޑިއޯ ކްލިޕްތައް ސޯޝަލް މީޑިއާގައި ހިއްސާ ކޮށްފަ އެވެ. އަދި މި ކަމުގެ ސަބަބުން އެ މީހުންގެ އެތައް މިލިއަން ފޭނުންގެ މެދުގައި ސޮނެވާފުއްޓާއި ރާއްޖޭގެ ޖަޒީރާތަކުގެ މަގުބޫލުކަން އާދަޔާ ހިލާފަށް ބޮޑުވެފައިވާކަން، ފޭނުންގެ ކޮމެންޓްތަކުން އެނގެ އެވެ.
“ޝާޒިންގާ އައުމުން ރާއްޖޭގެ ހައިބަތު ބޮޑުވެއްޖެ” ކަމަށް، ނިއު ދިއްލީގައި ހުންނަ އިންޑިއާގެ އިންޖިނޭރެއް ކަމަށްވާ ރޮބިން ރާއޯ، ޝާޒިންގާ ސޮނެވާފުށީގެ ބީޗްގައި އިރުއޮއްސޭ މަންޒަރު ބަލާ ދެ ފޮޓޯއަށް ކޮށްފައިވާ ކޮމެންޓެއްގައިވެ އެވެ.
ދުނިޔޭގެ މަޝްހޫރު ސެލެބްރިޓީންގެ މެދުގައި ރާއްޖޭގެ ލަގްޒަރީ ޓޫރިޒަމްގެ މަގުބޫލުކަން ބޮޑުވަމުން އަންނައިރު، ހޮލީވުޑްގެ ބޮޑު ބަޖެޓް ފިލްމެއް ވެސް މިހާރު ލ. އަތޮޅުގައި ދަނީ ޝޫޓު ކުރަމުންނެވެ.
އޯލްޑްރިން އާއި ޝާޒިންގާގެ ސޯޝަލް ވިއުގާގައި ކޮމެންޓް ކޮށްފައި ހުރި މީހުން ބުނެފައިވަނީ މި ތަރިންގެ ފޮޓޯތަކުން ވެސް “ދިވެހި ރާއްޖެ އަކީ ދުނިޔެ މަތީގެ ސުވަރުގެއެއްކަން މިހާރު ކަށަވަރުވެފައިވާ” ކަމަށާއި “މަރުުވުމުގެ ކުރިން އުމުރުގެ ކޮންމެވެސް ހިސާބެއްގައި ރާއްޖެއަށް ޒިޔާރަތް ކުރާނެކަން ކަށަވަރު” ކަމަށެވެ.
އިންޑިއާގެ ބޮމްބޭގައި އެތައް މިލިއަން ފޭނުން ތިބި ސަނަމް މިއުޒިކް ބޭންޑުން ދާދި ފަހުން ދިވެހި ލަވަކިޔުންތެރިޔާ މީރާ މުހައްމަދު މާޖިދު އާއެކު އައްޑޫ ސިޓީގެ ހެރަތެރަ ރިސޯޓްގައި ނަގާފައިވާ “ޔެ ވާދާ ރަހާ”ގެ ކަވަރު ލަވަ ބެލި ގިނަ މީހުން ވެސް ސޯޝަލް މީޑިއާގައި ކޮމެންޓް ކޮށްފައިވަނީ “ދުރު ކުރިމަގަކަށް ވިސްނައިގެން ފައިސާ ފަހަށް ރައްކާ ކޮށްގެން ވެސް ރާއްޖެ ބަލައިލުމަށް އައުމަކީ މިހާރު އެ މީހުންގެ ދިރިއުޅުމުގެ އެންމެ ފޮނި މަގުސަދުތަކުގެ ތެރެއިން އެއްމެ މުހިންމު އެއް މަގުސަދު” ކަމަށެވެ.
