ދުނިޔޭގެ ސްކައުޓް ހަރަކާތުން ފާހަގަކުރާ “ފައުންޑާސް ޑޭ” އާއި ގައިޑުންގެ “ތިންކިން ޑޭ” ފާހަގަކުރުމުގެ ގޮތުން ބ. އަތޮޅު ތައުލީމީ މަރުކަޒުން ހިނގާލުމެއް ބާއްވައިފި އެވެ.
ބ. އަތޮޅު ތައުލީމީ މަރުކަޒުން ބުނީ މި ހިނގާލުމުގެ މަޤްސަދަކީ ދުނިޔޭގެ ސްކައުޓް ހަރަކާތުގެ އެއް ޝިއާރު ކަމަށްވާ “ސްކައުޓިން- ތައުލީމް ދިރިއުޅުމަށް” އަދި ގާލްގައިޑުންގެ ތިންކިން ޑޭ ޝިއާރު ކަމަށްވާ “ގުޅުން ބަދަހިކުރުން” މި ޝިއާރުތަކަށް އަމާޒުކޮށްގެން މައުލޫމާތު އެކުލެވޭ މެސެޖްތައް މުޖްތަމައަށް ދިނުން ކަމަށެވެ.
މި ހަރަކާތުގައި ސްކައުޓުންނާއި ގާލްގައިޑުންގެ އިތުރުން ކަބް ސްކައުޓުންނާއި، ލިޓިލްމެއިޑް ކުދިން ބައިވެރިވި އެވެ. މި ހިނގާލުމުގައި، ރަށުގެ ބައެއް ސަރަހައްދުތަކަށް މަޑުކޮށް މުނިފޫހި ފިލުވުމުގެ ހަރަކާތްތައްވެސް ކުރިއަށް ގެންގޮސްފައިވެ އެވެ.
ދުނިޔޭގެ 162 ގައުމެއްގައި ސްކަައުޓް ހަރަކާތް ހިންގާ އިރު 40 މިލިއަނަށްވުރެ ގިނަ ސްކައުޓުން ހިމެނެ އެވެ.
ސްކައުޓުން ފައުންޑާސް ޑޭ ފާހަގަކުރަނީ ދުނިޔޭގެ ސްކައުޓް ހަރަކާތުގެ ބާނީ، ބޭޑްން ޕަވަލްގެ ހަނދާނުގަ އެވެ. އަދި ތިންކިން ޑޭ ފާހަގަކުރަނީ ދުނިޔޭގެ ގާލްގައިޑް ހަރަކާތުގެ ބާނީ އޮލެވް ބޭޑްން ޕަވަލްގެ ހަނދާނުގަ އެވެ.
Scout Founder's Day 2016:B. AEC Scouts and Girl Guides.
Posted by The Scout Association of Maldives on Monday, February 22, 2016
