14 ވަނަ އިންޓަ ސްކޫލް ބެޑްމިންޓަން މުބާރާތުގެ ސެމީ ފައިނަލަށް ބ. އަތޮޅު ތައުލީމީ މަރުކަޒުގެ ޓީމުތައް ދަތުރުކޮށްފި އެވެ.
މި މުބާރާތުގެ ޓީމު އިވެންޓްގައި ތައުލީމީ މަރުކަޒުގެ ތިން ޓީމު ބައިވެރިވި އެވެ. އެ ތިން ޓީމުވެސް ސެމީ ފައިނަލުން ޖާގަ ހޯދީ ކުޅުނު ހުރިހާ މެޗަކުން ފަސޭހަ ކަމާއެކު ކާމިޔާބުކޮށް ގްރޫޕްތަކުގެ އެއްވަނަ ޓީމުތަކުގެ ގޮތުގަ އެވެ.
ބ. އަތޮޅު ތައުލީމީ މަރުކަޒުގެ 19 އަހަރުން ދަށުގެ ފިރިހެން ޓީމު ސެމީ ފައިނަލުން ޖާގަ ހޯދީ ރ. އަތޮޅު ތައުލީމީ މަރުކަޒު އަތުން 4-1 އިން މޮޅުވެގެންނެވެ. ސެމީ ފައިނަލުގައި އެ ޓީމު ވާދަކުރަން މުލަކު ސްކޫލާ އެވެ.
ތައުލީމީ މަރުކަޒުގެ 16 އަހަރުންދަށުގެ އަންހެން ޓީމު ސެމީ ފައިނަލުން ޖާގަ ހޯދީ ޅ. އަތޮޅު ތައުލީމީ މަރުކަޒާ ވާދަކޮށް ސީދާ 5 މެޗުން މޮޅުވެގެންނެވެ.
މުބާރާތުގައި ވާދަކުރާ ތައުލީމީ މަރުކަޒުގެ 14 އަހަރުން ދަށުގެ ފިރިހެން ޓީމު ސެމީ ފައިނަލުން ޖާގަ ހޯދީ މިރޭ ކުޅުނު މެޗުގައި 4-1 އިން އިމާދުއްދީން ސްކޫލުގެ މައްޗަށް ކުރި ހޯދައިގެންނެވެ.
މާޗު މަހުގެ 18 އިން 25 އަށް ނިޔަލަށް މާލޭގައި ބޭއްވުމަށް ހަމަޖެހިފައިވާ މި މުބާރާތުގައި 17 ސްކޫލަކުން ވާދަކުރެ އެވެ.
މުބާރާތުގެ ސެމީ ފައިނަލު މެޗުތައް މާދަމާ ފަށާނެ އެވެ.
