ޔުނެސްކޯ ބ. އަތޮޅު ބަޔޮސްފިއާ ރިޒާވު އޮފީހުގެ ޓީމެއް ތަޖުރިބާ ހިއްސާކުރުމުގެ ދަތުރެއްގައި އައްޑު އަތޮޅަށާއި ފުވައްމުލަކަށް ހިނގައްޖެ އެވެ.
އިއްޔެއިން ފެށިގެން އަންނަ ބުދަ ދުވަހުގެ ނިޔަލަށް ކުރާ މި ތަޖުރިބާ ދަތުރުގައި ބަޔޮސްފިއާ ރިޒާވު ކޮންޒަވޭޝަން ފަންޑުގެ މެނޭޖިން ޑިރެކްޓަރު އަބްދުﷲ ޝިބާއު އާއި އެ އޮފީހުގެ ބައެއް މުވައްޒަފުންގެ އިތުރުން ބ. އަތޮޅު ކައުންސިލުގެ މެންބަރު ހަަސަން ސިރާޖުވެސް ބައިވެރިވެވަޑައިގަންނަވަ އެވެ.
ޝިބާއު ވިދަޅުވި ގޮތުގަިއ މި ދަތުރުގެ މައިގަނޑު ބޭނުމަކީ އައްޑު އާއި ފުވައްމުލަކުގައި ހިމާޔަތް ކޮށްފައިހުރި މުހިއްމު ސަރަހައްދުތައް ބަލައި އަޅުގަނޑުމެން ބ. އަތޮޅު ބަޔޮސްފިއާ ރިޒާވުގެ ތަޖުރިބާ އެ ފަރާތްތަކާ ހިއްސާކުރުމެވެ.
މީގެ އިތުރަށް އައްޑޫ އާއި ފުވައްމުލަކުގެ ތާރީހީ އެކި ތަންތަނަށް ޒިޔާރަތްކޮށް އެ ތަންތަނާ ބެހޭ މައުލޫމާތު ހޯދުމާއި ސަގާފީ އެކިއެކި އާދަތައް ހިއްސާކުރުން ވެސް މި ދަތުރުގެ ބޭނުމުގެ ތެރޭގައި ހިމެނެ އެވެ.
މި ދަތުރުގަިއ ބަޔޮސްފިއާ ރިޒާވް އޮފީހުގެ ޓީމުން މިއަދު އައްޑު ކައުންސިލާ އަދި ސަންގްރިއްލާ ރިސޯޓް ގެ މެނޭޖްމަންޓާވެސް ބައްދަލުކޮށް ތަޖުރިބާ ހިއްސާކުރާގޮތަށް ވަނީ ހަމަޖެފިފައެވެ. މީގެ އިތުރުން މި ދަތުރުގައި ފުވައްމުލަކު އަތޮޅު ކައުންސިލާވެސް ބައްދަލުކުރާނެ އެވެ.