ބ. އޭދަފުށީ ހިއްކި ބިމުން ދޫކުރާ ގޯއްޗަށް އެދި ކުރިމަތިލާފައިވާ މީހުންގެ ފޯމްތައް އިވެލުއޭޓް ކޮށް ނިމޭވަރު ވާނީ އަންނަ ނޮވެމްބަރު މަހުގެ ނިޔަލަށް ކަމަށް އޭދަފުށީ ކައުންސިލުން ބުނެފި އެވެ.
އޭދަފުށީ ކައުންސިލުން ރޭ އާއްމުކުރި ނޫސް ބަޔާނެއްގައި ބުނީ، އޭދަފުށިން ގޯތި ދޫކުރުމަށް މިހާރު ކުރިއަށްދަނީ ގޯއްޗަށް އެދިފައިވާ ފަރާތްތަކުގެ ފޯމުތައް ވިލަރެސްކުރުމުގެ މަސައްކަތް ކަމަށެވެ. އެގޮތުން ރޭގެ ނިޔަލަށް 290 ފޯމަށް ޕޮއިންޓް ދެވިފައިވާއިރު، އަދި ބާކީ ހުރި ފޯމުތަކަށް ޕޮއިންޓް ދިނުމަށް އިތުރު 3 މަސްދުވަހުގެ މުއްދަތެއް ނަގާނެކަމަށް ލަފާކުރެވޭ ކަމަށް ކައުންސިލުގެ ނޫސްބަޔާނުގައި ވެ އެވެ.
އޭދަފުށީގެ ހިއްކި ސަރަހައްދުން ދޫކުރަން ނިންމާފައިވާ 83 ގޯއްޗަށް 533 މީހުން ވަނީ ކުރިމަތިލައިފަ އެވެ.
ނޫސް ބަޔާނުގައި ބުނިގޮތުގައި، ކައުންސިލުގެ އަމާޒަކީ ވީހާވެސް އަވަހަކަށް މި މަސައްކަތް ނިންމައި، ގޯތި ލިބޭ ފަރާތްތަކުގެ ލިސްޓު އާންމުކުރުމެވެ.
ކައުންސިލުން އިތުރަށް ފާހަގަކުރި ގޮތުގައި، މި މަސައްކަތާ ގުޅިގެން އިތުރު ލަސްވުމެއް އަތުވެދާނެ ކަމަށްވާނަމަ، އެކަމުގެ މަޢުލޫމާތު ރައްޔިތުންނާ ހިއްސާކުރަމުން ގެންދާނެއެވެ.
އޭދަފުށިން ގޯތިދިނުން ލަސްވާތީ، އެކަމާމެދު ހިތްހަމަނުޖެހިގެން މަގުތަކުގައި ބައެއް އާއްމުން ނުކުމެ، ވަނީ ސްލުހަވެރި މުޒާހަރާތަކެއްވެސް ބާއްވައިފަ އެވެ.
